“Se Faaaʻoaʻoga o le Autasi”

O LE ulutala lena o se tala sili a le faatonu na lomia i se nusipepa i le aai o Indaiatuba, i São Paulo, i le atunuu o Pasili. O ai na faataatia maia le faaaʻoaʻoga? Na faamatala mai e le alii tusitala e faapea: “O loo faataatia e Molimau a Ieova, o ē o loo fuafua e fausia se fale fou o le ‘Maota o le Malo,’ e pei ona faaigoa ai o latou malumalu po o fale tetele, se faaaʻoaʻoga lelei ma le moni o le felagolagomaʻi lea e lē mafai ona ʻalofia.”

E matuā manino lelei mai le autasi o Molimau a Ieova i taimi faapea. O lea, na taʻua mai ai e le mataupu e faapea: “E faagaeeloto le vaai atu i le ʻaufaigaluega tauofo, o tane, o fafine, ma talavou o loo naunau e galulue faatasi i le fausiaina o se nofoaga e mafai ona latou potopoto i ai ma tapuaʻi atu i le Atua.”

E iai foʻi isi vala o loo faataatia ai e Molimau a Ieova se faaaʻoaʻoga lelei. Ua toe faapea mai le tusi: “E lē gata i le suʻesuʻe ma le tatalo, ae latou te sini foʻi e fesoasoani atu e toe faaleleia ē ua pulea e le ava malosi ma fualaau faasāina, ma faasino i tagata le ala o le autasi ma le alofa.” E faapefea ona latou ausia lenei sini? E iloa e Molimau o le aʻoaʻoina ma le faatatauina o fautuaga a le Tusi Paia e fesoasoani i se tagata ina ia saʻoloto ai mai uiga leaga. O le pogai lena latou te taumafai malosi ai e aʻoaʻo i isi tagata mea ua latou aʻoaʻoina mai le Tusi Paia. Ua faaiʻu mai le tusi e faapea, o a latou gaoioiga o “se faaaʻoaʻoga, e mautinoa lava, le matuā manaʻomia ona faataʻitaʻi atu i ai.”

E talia fiafia e Molimau a Ieova le mamalu lautele ina ia afifio mai i a latou sauniga, ma e leai ni peleti e aoina. Ua valaaulia ma le māfana oe ina ia e susū atu e asiasi i se tasi o Maota o le Malo o loo latalata ane i le mea o e alaala ai.