Filemu i le Lalolagi—E Mafai Faapefea?

PO UA latalata le oo mai o le filemu i le lalolagi? E toʻatele sa iai ni manatu faapena, ae i le taimi nei ua lē mautinoa. E tusa ma se lipoti o loo talanoaina ai luʻi mo lo tatou lumanaʻi lea o loo faasalalauina i le nusipepa a Aferika i Saute o le Daily Mail & Guardian, “o valovaloga e uiga i se faiga fou tuufaatasi faava-o-malo na faia mo na o le 10 tausaga ua mavae, e foliga mai i le taimi nei o ni faamoemoega lē faavaea.”

O loo manatunatu le ʻautusitala i le uiga o le faamoemoe mo se mea lelei lea na taatele i le na o le sefulu tausaga ua mavae. O lea faatoʻā faaiʻuina le Taua Faaupufai a Malo, ma ua lē toe iai se feteenaʻiga a malo malolosi o le lalolagi. O le mea la na foliga mai o le amataga o se vaitaimi fou, ua faatalitalia ai e le toʻatele e faapea o le a amata ai ona faia e le fanau a tagata ni agaʻigaʻi i luma tāua e faafetaiaʻia ai le mativa, o maʻi, ma mataupu tau i le siʻosiʻomaga. Ua faapea mai le lipoti: “O na faasalalauga e foliga mai i le taimi nei ua na o ni faamoemoega lē taunuu. E tele ni fetauaʻiga fou ua aliaʻi mai i vaipanoa tatou te tau lē iloa; o loo faaauau pea ona siisii i luga le tulaga mativa i le lalolagi. E lua ni atunuu o loo iai ia meatau malolosi faaniukilia. Ua matuā faavaivaia lava le tulaga faaaloalogia o Malo Aufaatasi ona o le lē lava o lana tali atu i le faasologa o mala ua aafia ai tagata. Ua suia la uiga o tagata mai le iai o se lumanaʻi lelei atoatoa i le matuā leai o se faamoemoe.”

Ua iloa e tagata suʻesuʻe o le Tusi Paia e faapea, e ui lava ina lelei taumafaiga a tagata, ae e lē taitai lava ona taulau atoatoa. Aiseā e lē taulau ai? Auā e pei ona taʻua i le Tusi Paia, “o le lalolagi uma o loo nofo toilalo i loo leaga.” (1 Ioane 5:19) A o iai i lalo o le pulega a Satani, e lē mafai ona aumaia le lalolagi i le tulaga faa-Parataiso lea na foafoaina ai e le Atua.

I le taimi lava e tasi, o loo iai le faavae mo ni faamoemoega lelei. Ua folafola mai e Ieova le Atua le aumaia o le filemu i le lalolagi, e lē i le fonofonoina o lenei faiga o mea, ae i le aumaia o “le lalolagi fou” ma o iinā “e mau ai le amiotonu.” (2 Peteru 3:13) Ioe, e ala i le Malo o le Atua, o le a faaliliuina lo tatou lalolagi e avea ma aiga filemu ma fiafia, o le a avea ai le olaga ma galuega o se mea e fiafia ai pea le fanau usiusitai uma a tagata. E lē gata i lea, ua folafola mai e le Atua na te “sōloiesea . . . loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga.” O nei folafolaga e lē o faavaeina i ni valoaga lē mautinoa a tagata. Na i lo o lea, o loo faavaeina i le Afioga lē masesē a Lē na Foafoaina mea e lē mafai ona tala pepelo.—Faaaliga 21:4; Tito 1:2.