Pe o Aliali Mai ea se Autasi Faalelotu?
Na taʻua e le peresitene o le Lutheran World Federation o Christian Krause e faapea: “Ua tatou molimauina se aso iloga i le talafaasolopito o a tatou lotu.” I se tulaga talitutusa, na saunoa ai foʻi Pope Ioane Paulo II e faatatau i “se tulaga mataʻina i le ala fitā i le tau atiina aʻe o le autasi atoatoa i le vā o Kerisiano.”
Na uunaʻia nei faalauiloaga aasa e le sainia o se Faamatalaga Aloaʻia Autasi ia Oketopa 31, 1999, i Augsburg, i Siamani i le faamautinoaga o le Taʻutinoga Soofaatasi i le Aʻoaʻoga o le Faaolataga. Sa filifilia lelei le taimi ma le nofoaga e faia ai lea sainiga aao. Na taʻua faapea, ia Oketopa 31, 1517, na faamau ai e Matini Luteru ana mataupu taʻutaʻua e 95 i le faitotoʻa o le falesa i Wittenberg, ma na amata mai ai iinā le Porotesano Toefuataʻiina. O le mea moni o Augsburg, na tauaaoina ai e tagata Lutheran i le 1530 le latou aʻoaʻoga faavae, le Taʻutinoga i Augsburg, lea na teena e le Lotu Katoliko, na taʻitaʻia atu ai i se feteenaʻiga na tauau ina lē mafai ona foʻiaina i le vā o faiga faa-Porotesano ma le faa-Katoliko.
Pe o le a avea ea le Taʻutinoga Soofaatasi ma laasaga mautinoa e manumalo mai ai i le fevaevaeaʻi o lotu, e pei ona manatu i ai? Sa leʻi faamoemoe itu uma e faaleleia le tulaga o mea. E silia ma le 250 tagata Porotesano e suʻesuʻe i mataupu faalelotu na latou sainia se tagi e tetee ai, i le lapataʻi atu e tusa ai o le ono pulea faamalosi e le Lotu Katoliko. Sa lē fiafia foʻi tagata Porotesano ina ua faalauiloa e le Lotu Katoliko sa latou fuafuaga faapitoa mo le faamagaloga o agasala i le tausaga e 2000, le faiga tonu lava lea na mapuna aʻe ai le feteenaʻiga i le pe ā ma le 500 tausaga ua tuanaʻi. Ma talu ai e lē gata o loo faaauau pea le Taʻutinoga i Augsburg ma le tali atu i ai o le Lotu Katoliko lea sa faia e le Fono a Trent ua matuā faafaigatā lava la ona maua se autasi.
Ua matuiā tele le fevaevaeaʻiga ma le lē femalilieaʻi i totonu o Kerisinetoma na i lo le tulaga e mafai e so o se taʻutinoga soofaatasi na sainia ona faasaʻoina. E lē gata i lena, o le autasi i le faatuatua e faalagolago i talitonuga ua faavaeina ma le mautū i le Afioga a le Atua, le Tusi Paia. (Efeso 4:3-6) Na i lo se autasi e māfua mai i ni fetuutuunaʻiga ua faia, o le autasi moni e puna mai le aʻoaʻoina ma le faia o mea o loo faafinagaloina e le Atua mai ia i tatou. Na faalauiloa mai e le perofeta o Mika e faapea: “O nuu uma e taitasi ma savali i le igoa o latou atua, o i tatou foi, tatou te savavali i le suafa o Ieova lo tatou Atua e faavavau faavavau lava.”—Mika 4:5.
[Faamatalaga i Ata i le itulau 32]
© Ralph Orlowski/REUTERS/Archive Photos