“Se Mea e Tatau Ona Aumaia ai le Fiafia i Tagata Uma”

O TUVALU, o se atunuu matagofie i le Pasefika i Saute, e faia aʻe i motu e iva, o le faitau aofaʻi o tagata e i ai e pe tusa ma le 10,500. Ae, o loo iloa pea e faapea, o le Atua “o lē finagalo ina ia faaolaina o tagata uma lava, ma ia oo ina iloa lelei le upu moni,” sa moomoo ai Molimau a Ieova i lea atunuu ina ia maua ni a latou lomiga faale-Tusi Paia i la latou lava gagana. (1 Timoteo 2:4) O lenei mea na tulaʻi mai ai se luʻi, ona sa leai se lomifefiloi na maua i le gagana a le atunuu. I le 1979, na tauaaoina ai e se misionare Molimau a Ieova sa auauna i Tuvalu lenei luʻi. Sa nonofo o ia ma lona faletua i se aiga Tuvalu, na aʻoaʻoina ai le gagana, ma agaʻigaʻi mālie lava ona faia se tuufaatasiga o upu Tuvalu. E oo ane i le 1984, ua mafai ona lomia e le Watchtower Bible and Tract Society of New York, Inc. le tusi, E Mafai ona E Ola e Faavavau i Parataiso i le Lalolagi i le gagana Tuvalu.

Na tusia ai e Dr. T. Puapua, o lē na avea muamua ma palemia o Tuvalu se tusi e faaalia ai lona talisapaia o le tusi, Ola e Faavavau. Na ia tusi mai e faapea: “O lenei tusi, o se tasi lea o faaopoopoga fou ma le tāua i le ‘tamaoaiga’ o Tuvalu. E tatau ona e matuā fiafia i le vaega ua e faia—o se vaega silisili ona lelei mo le atiina aʻe o le olaga faaleagaga o tagata o lenei atunuu. Ou te talitonu o le a faamaumauina lenei galuega i le talafaasolopito o Tuvalu e faatatau i le lomiaina o tusi faaleaʻoaʻoga. . . . O lenei [tusi], o se mea e tatau ona aumaia ai le fiafia i tagata uma.”

O le lisi o faaputuga upu a le faaliliu, na iʻu ai ina lomia se lomifefiloi i le gagana Tuvalu ma le faa-Peretania i le 1993. O le uluaʻi lomifefiloi lea ua saunia mo tagata lautele i lena gagana. Talu ai nei, na talosaga atu ai le Komiti Tau i Gagana a le Atunuu mo se faatagaga e faaaogā ai lea lomifefiloi e faia aʻe ai se uluaʻi lomifefiloi i la latou lava gagana.

Talu mai Ianuari 1, 1989, ua lomia ai i masina taʻitasi le mekasini o Le Olomatamata i le gagana Tuvalu. Afai o e faitauina lenei mekasini i se gagana e lē o lau gagana masani, aiseā e lē siaki ai le itulau e 2 ma vaai po o aofia ai lau lava gagana i gagana na o loo lomia ai Le Olomatamata? O le faitauina o Le Olomatamata i lau lava gagana, e lē taumatea o le a e maua ai le olioli tele.