“Manua Mai le Uō”

SA ILOA e le aposetolo o Paulo le manaʻomia ona tuuina atu o ni faasaʻoga i Kerisiano o le uluaʻi senituri i Kalatia. E foliga mai ina ia taofia le feitagaʻi, na ia fesili atu ai e faapea: “Ia, po ua outou avea ea aʻu mo outou fili i loʻu taʻuina atu ia te outou le upu moni?”—Kalatia 4: 16, LF.

I le ‘taʻuina atu o le upu moni,’ sa leʻi avea Paulo ma o latou fili. O le mea moni, sa gaoioi o ia e ōgatusa ma le mataupu silisili o le Tusi Paia e faapea: “E faamaoni manua mai le uo.” (Faataoto 27:6) Sa ia iloa e faapea, o faalogona mitamita o ē fai mea sesē e ono faamanuʻalia ai. Peitaʻi, sa ia iloa o lona lē tuuina atu o le aʻoaʻiga o loo manaʻomia e le tagata agasala, e ono oo ai ina lē maua e lena tagata le alofa o Ieova le Atua. (Eperu 12:5-7) O le mea lea, i le avea o se uō faamaoni ma e naunau i le lelei tumau o le faapotopotoga, sa leʻi solomuli ai Paulo i le avatua o fautuaga e faasaʻo ai.

I aso nei, ua faataunuuina ai e Molimau a Ieova lo latou tofiga “e fai nuu uma lava ma soo, . . . aʻoaʻo atu ia te i latou ia tausi i mea uma ua fai atu ai [Iesu Keriso].” I le faia o lenei mea, e lē faagutugutulua ai nei Kerisiano faamaoni i upu moni o le Tusi Paia o loo faaalialia ma taʻusalaina ai aʻoaʻoga sesē ma amioga e lē faa-Kerisiano. (Mataio 15:9; 23:9; 28:19, 20; 1 Korinito 6:9, 10) Na i lo o le avea o ni fili e tetee i ai, e latou te faaalia le naunau o ni uō moni.

Faatasi ma le malamalama faagaeeina mai le Atua, na tusia ai e le faisalamo e faapea: “Ia fasia mai aʻu e le tagata amiotonu, o le alofa lava lea; ia aoai mai foi o ia ia te au, o le suāuu i loʻu ulu lea, e le ʻalo ai loʻu ulu.”—Salamo 141:5.