Na Tauia Lona Onosai

E toʻatele tagata faamaoni e mananaʻo i ē pele iā i latou ina ia iloa fuafuaga a le Atua ma ia ola i se olaga fiafia. Pe a tuuina atu e se tasi ia lava i le Atua, e lē taumatea e iai nisi e matutua pe talavou sa fesoasoani i le faia o lenā faaiʻuga atamai, e ala i o latou uiga lelei faaalia. E faapena le mea na tupu iā Jearim, o se teineitiiti e 15 tausaga i Mexico. I se aso faapitoa o fonotaga a Molimau a Ieova, sa ia tuuina atu ai i uso se tusi e faapea:

“Ou te manaʻo ia outou iloa loʻu olioli tele o loo iai i le taimi nei. Seʻi oʻu faamatala atu le māfuaaga. I le 18 tausaga ua mavae ae ou te leʻi fanau mai, na aʻoaʻoina ai e oʻu mātua le upu moni. Sa faatatauina e loʻu tinā le upu moni, sosoo ai ma loʻu tuagane, ia ma aʻu foʻi. Sa matou tatalo faatasi iā Ieova ina ia talia foʻi e loʻu tamā le upu moni. Ua 18 tausaga ua mavae atu talu mai lenā taimi, ma o le asō o se aso aupito sili lea ona tāua iā i matou. O le a papatiso ai loʻu tamā. O lea, ou te faafetai ai iā Ieova ona o lona lē faaooina mai o le iʻuga, a o leʻi oo mai lenei taimi faapitoa ua leva ona faatalitalia. Faafetai tele lava, Ieova!”

I le tele o tausaga, sa faatāuaina ai e le aiga o lenei teineitiiti mataupu silisili o loo faamauina i le 1 Peteru 3:1, 2, (LF) e faapea: “Ia faapea outou fafine, ia usiusitai i a outou lava tane, afai foʻi e lē faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio mamā ma le faaaloalo.” Sa faatatauina foʻi e Jearim upu o loo taʻua i le Teuteronome 5:16: “Ia e ava i lou tamā ma lou tinā, pei ona poloaʻi mai ai o Ieova lou Atua iā te oe.” O le faatatauina o nei mataupu silisili ma faatalitali ma le onosai iā Ieova, na faamanuiaina ai Jearim ma lona aiga.