Fesili Mai le ʻAufaitau

O le ā le uiga o le tala a Paulo ina ua ia faapea mai: “O aso uma tou te aai ai i lenei areto, ma feinu i lenei ipu”?

I le taʻua o le Faamanatuga o le maliu o Iesu, na tusia ai e Paulo e faapea: “O aso uma tou te aai ai i lenei areto, ma feinu i lenei ipu, tou te faailoa atu ai le maliu o le Alii seʻia afio mai o ia.” (1 Korinito 11:25, 26) Ua manatu nisi e faapea, o le upu lea e taʻua i inei, “o aso uma,” ua faaalia ai e tatau ona faamanatu soo le maliu o Keriso, o lona uiga ia faatele ona faia. O lea, sa latou faamanatu soo ai na i lo o le na o le faatasi i le tausaga. Po o le uiga ea lenā o le tala a PauIo?

Ua toetoe nei atoa le 2,000 tausaga talu ona faavaeina e Iesu le Faamanatuga o lona maliu. O lea la, e tusa lava pe sa faatasi i le tausaga ona faia le Faamanatuga, ae o lona uiga, sa faamanatuina lava e i latou i aso uma talu mai le 33 T.A. Ae peitaʻi, i le manatu autū i le 1 Korinito 11:25, 26, sa talanoaina ai e Paulo le auala e tatau ona faia ai le Faamanatuga, ae lē o le faamanatuina i aso uma. I le faa-Eleni anamua, na te leʻi faaaogāina ai le upu, pol·laʹkis, o lona uiga “aso uma” po o le faia “soo.” Na i lo o lea, sa ia faaaogā le upu ho·saʹkis, o lona uiga “i so o se taimi,” o se alagāupu o lona uiga “po o le ā lava le taimi,” “i taimi uma lava.” Na faapea mai Paulo: ‘O taimi uma e tou te faia ai lenei mea, ia outou faailoa atu ai pea le maliu o le Alii.’a

O le ā la le tele e tatau ona faia ai le Faamanatuga o le maliu o Iesu? E talafeagai ona faamanatuina e tau o le faatasi i le tausaga. O se aso faamanatu moni lava, ma o aso faamanatu e masani ona faamanatuina i tausaga taʻitasi. E lē gata i lea, na maliu Iesu i le aso o le Paseka faa-Iutaia, lea sa faia e faatasi i le tausaga. Ua talafeagai ai la ona taʻua e Paulo Iesu “o Keriso la tatou paseka,” talu ai, o le maliu faataulagaina o Keriso, na maua ai e le Isaraelu faaleagaga le avanoa i le ola, e pei lava ona faasaoina e le taulaga o le uluaʻi Paseka ia ulumatua a Isaraelu faaletino i Aikupito, ma maua ai le avanoa mo le faasaʻolotoina o le nuu mai le nofo pologa. (1 Korinito 5:7; Kalatia 6:16) O le fesootaʻiga lenei ma le Paseka faaletausaga a Iutaia, o se faamaoniga atili e iloa ai, o le Faamanatuga o le maliu o Iesu, e tatau ona faatasi i le tausaga.

E lē gata i lea, na faafesootaʻi atu foʻi e Paulo le maliu o Iesu i se isi tausamiga faaletausaga a Iutaia, le Aso o le Togisala. I le Eperu 9:25, 26, ua tatou faitau ai: “A e lē ina ia avatu soo o ia e ia [Iesu] ma taulaga, pei o le faitaulaga sili ona ulu atu i le mea paia i lea tausaga ma lea tausaga [i le Aso o le Togisala] ma le toto ese . . . a o lenei, ua tasi lava le faaalia mai o ia i le faaatoaga o tausaga, ina ia aveeseina le agasala, ina ua faia o ia e ia ma taulaga.” Talu ai na suia e le taulaga a Iesu le taulaga o le Aso o le Togisala faaletausaga, ua talafeagai ai la ona faia i tausaga taʻitasi le Faamanatuga o lona maliu. E leai se faavae faale-Tusi Paia e faamanatu soo ai le Faamanatuga na i lo o lenā.

I le ōgatasi ai ma lenei mea, ua lipotia mai e le tusitala o talafaasolopito o John Laurence von Mosheim e faapea, sa fai ma masani a Kerisiano i Asia Itiiti i lona lua o senituri ona faamanatuina le Faamanatuga o le maliu o Iesu “i le aso 14, o le masina muamua o le kalena faa-Iutaia [o Nisani].” Ae, i tausaga lata mai nei lava, na avea ai o se tū a lotu Kerisiano le faamanatuina o le Faamanatuga i aso uma na i lo o le faatasi i le tausaga.

[Faamatalaga pito i lalo]