E Manatua Pea Molimau a Ieova o Ē na Faasalaina i le Oti

IĀ Mati 7, 2002, na tatala aloaʻia ai se faailoga taualoa e pei o se maa faamanatu i le aai o Körmend i le itu i sisifo o Hagakeri. Sa faamanatuina ai ni Molimau a Ieova se toʻatolu na maliliu ina ua fasiotia e le ʻAu Nasi i le 1945.

O loo faapipii lenei faailoga i le puipui o le fale o le ofisa ulu o tinei mū i le Auala o Hunyadi, le nofoaga tonu sa faia ai faasalaga oti o tagata i luma o le lautele. O lenei faailoga, sa faamanatu ai ‘Kerisiano o ē na fasiotia ona o le lē auai i vaegaʻau iā Mati 1945. O Antal Hőnisch (1911—1945), Bertalan Szabó (1921-1945) János Zsondor (1923-1945) o i latou uma o ni tane Molimau a Ieova.’

Sa faataunuuina nei faasalaga oti ae tusa toe lua masina māeʻa le Taua Lona Lua a le Lalolagi. Aiseā na fasiotia ai nei Kerisiano? Ua faamatala mai e le nusipepa a Hagakeri o le Vas Népe e faapea: “Ina ua pulea e Hitila Siamani, sa avea tagata Siū faapea foʻi ma Molimau a Ieova ma taulaʻiga o sauāga, faasaunoa i ai, faasalaina i nofoaga o faasalaga mamafa ma fasiotia pe afai latou te lē faafitia o latou talitonuga faa-lotu. . . Iā Mati 1945, na matuā faamataʻuina ai i latou uma sa i le itu i sisifo o Hagakeri. . . . O se tasi o vaega o lenei faamataʻuina o le aveesea lea ma fasiotia o Molimau a Ieova.”

Sa vaevaeina i ni vaega se lua le polokalame lenei o le tatalaina aloaʻia o le faailoga faamanatu. O le vaega muamua sa faia i le maota o Batthyány, lea sa aofia ai i failauga le polofesa o Szabolcs Szita, o ia o le faauluuluga o Faamaumauga o Fasiotiga Tagata i Budapest; ma László Donáth, o ia o le sui o le Komiti a le Palemene mo Aiā Tatau a Tagata ma Mataupu Faale-Lotu, ma Kálmán Komjáthy, o lē na vaai tino i nei faasalaga oti, ma ua avea nei o ia ma tusitala o talafaasolopito o le aai. E sili atu i le 500 tagata na auai na savavali i le isi itu o le taulaga i le vaega lona lua o le polokalame— o le tatalaina lea o le maa faamanatu e le pulenuu o Körmend e suafa iā József Honfi.

I lana tusi faamavae, sa faalaeiau mai ai Ján Žondor (János Zsondor) i ona uso ma tuafāfine Kerisiano ina ia aua le faanoanoa. Na ia tusi mai e faapea: “Ou te manatua upu a Ioane o loo maua i le Faaaliga 2:10: ‘Ia e faamaoni seʻia oo i le oti.’ . . . Ia taʻu atu iā i latou uma i inā, e aua le faanoanoa, auā ua ou oti mo le upu moni ae lē o sē solitulafono.”

[Ata i le itulau 32]

Bertalan Szabó

[Ata i le itulau 32]

Antal Hőnisch

[Ata i le itulau 32]

Ján Žondor