“Ou te Leʻi Malamalama Tele e Uiga i le Atua”

NA TUSI mai se tamāloa e nofo i Kerala i Initia e faapea: “I le tausaga ua teʻa, sa asiasi mai ai Molimau a Ieova iā te aʻu ma faamatala mai tala matagofie e faatatau i le Malo o le Atua. Sa avea aʻu ma se tagata Katoliko mo le valu tausaga, peitaʻi ou te leʻi malamalama tele e uiga i le Atua. Ua ia faaopoopo mai, “I le tausaga lava lenā e tasi, ua ou aʻoaʻoina ai le tele o mea. Ua ou fiafia lava ina ua ou iloa o loo lomia Le Olomatamata i le 139 [lea ua 146 nei] gagana. O se mea e maofa ai, o tagata mai gagana uma o le a oo ina latou iloa le feaʻu e uiga i le Atua.”

E ui lava e toʻatele le ʻaufaifilosofia e faapea mai e lē mafai ona iloa le Atua, ae ua faaali faamanino mai e le aposetolo o Paulo e mafai. I le talanoa atu i se vaega o tagata Atenai, o ē na tapuaʻi i se fata faitaulaga sa tuuina atu “mo se Atua e Lē Iloa” na faapea mai Paulo: “Ua outou tapuaʻi i ai ma le lē iloa, ou te faailoa atu ai iā te outou. O le Atua na faia le lalolagi ma mea uma lava o i ai . . . o loo foaʻi mai e ia le ola, ma le mānava, ma mea uma lava i le vao mea atoa. Ua faia foʻi e ia nuu uma o tagata i le toto e tasi, ia nonofo i le fogāeleele uma lava.”—Galuega 17:23-26.

Na uunaia e Paulo lana ʻaufaalogologo ina ia saʻili i Lē na Foafoaina Mea, auā “e lē mamao o ia ma i tatou taʻitoʻatasi.” (Galuega 17:27) O le a fiafia Molimau a Ieova e fesoasoani iā te oe ia iloa le Atua moni ma ona uiga faaalia.