E Valaaulia ma le Māfana Oe

O LE Talisuaga Mulimuli lea na faavaeina e le Alii o Iesu Keriso i le pe a ma le 2,000 tausaga ua mavae, ua lē na o se mea manaia na tupu i le talafaasolopito. Ua iai sona aafiaga malosi i tagata talu mai le taimi na faavaeina ai. I le pāʻia o loto o tagata i mea na latou faitau ai mai i faamatalaga a Evagelia e faatatau i mea na tutupu i lenā pō, ua taumafai ai le toʻatele e faamanatu le Talisuaga a le Alii i ni auala eseese.

Ua mafai ona malamalama i nei mea uma talu ai na faatonuina e Iesu lava ia ona soo ina ia faamanatu lenei mea na tupu ma ia latou faia pea e lē aunoa. Sa ia taʻu patino atu lava iā i latou e faapea: “Tou te faia le mea nei e fai ma faamanatuga iā te aʻu.”—Luka 22:19; 1 Korinito 11:23-25.

Ioe, ina ia maua ni aogā mai lea aso faamanatu, e tatau i se tasi ona iai se malamalamaga saʻo i lona uiga, e pei ona aumaia ai i le Afioga a le Atua, le Tusi Paia. E lē gata i lea, e tāua foʻi le iloaina o faamatalaga a le Tusi Paia e uiga i lea aso ma le auala e faamanatuina ai.

Ona o le usiusitai i le faatonuga a Iesu, o le a faapotopoto ai Molimau a Ieova i le lalolagi aoao i le pō o le aso Lulu, Aperila 16, 2003, e faamanatuina le maliu o Iesu. O le a avea o se sauniga mo i latou e iloiloina ai le Tusi Paia ma toe faamalosia ai lo latou faatuatua ma le alofa mo le Alii o Iesu Keriso, o lē na faapea mai: “Auā ua faapea lava ona alofa mai o le Atua i le lalolagi, ua ia aumai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola e faavavau.” (Ioane 3:16) E valaaulia ma le māfana oe ina ia faapotopoto faatasi ma i latou i lenā pō ina ia mafai ai foʻi ona toe faamalosia lou faatuatua ma lou alofa mo Iesu Keriso ma le Tamā faalelagi, o Ieova le Atua.