‘Na Tuʻituʻi Mai ni Tagata se Toʻalua i lo Ma Faitotoʻa’

“UA ATOA nei tausaga e lua talu ona lofitūina i maʻua i le faanoanoa ona o le toesea o la ma tama teine.” O le faamatalaga amata lenā a se tusi na lomiaina e le nusipepa Le Progrès, i le aai o Saint-Étienne i Falani.

“E tolu masina o Mélissa, ma na maua o ia i le maʻi tigāina e taʻua o le trisomy 18. E lē mafai ona aveesea faalogona mafatia o se tasi ona o se mea tigā faapenei. E ui na ma ola aʻe i le lotu Katoliko, ae na faaauau pea ona ma manatu ‘Le Atua e, afai o e silasila mai, aiseā ua e faatagaina ai lenei mea leaga e tupu?’” E manino mai i le tusi lenei a le tinā, lona mafatia ma le leai o sona faamoemoe. O isi nei o faaupuga o lana tusi:

“E leʻi leva ona tupu lenei mea, ae tuʻituʻi mai loa ni tagata se toʻalua i lo ma faitotoʻa. Na ou iloa atu lava o i laʻua o ni Molimau a Ieova. Na ou manatu e fai faalelei i ai e toe foʻi, ae na ou vaai atu i se polosiua o loo la tau ofoina mai. O lenā polosiua e faatatau atu i le māfuaaga ua faatagaina ai e le Atua mafatiaga. Na ou filifili e faaulufale mai i laʻua i totonu, ae seʻi oʻu faasaga e taʻu le sesē o o la talitonuga. Na ou manatu faapea, ua matuā ōia lo matou aiga i le tele o faanoanoaga ma ua fiu foʻi taliga i le faalogo i manatu masani e pei o le ‘Na foaʻi mai e le Atua si lua tama ma ua toe aveesea foʻi e le Atua.’ E sili atu i le itula o matou talatalanoa ma le ʻau Molimau. Na la faalogologo mai ma le lē gasē a o oʻu talanoa atu, ma na ou ioe i ai e toe ō mai. Na matuā faaleleia ai lava oʻu faalogona. Ua atoa nei le lua tausaga talu ona tupu lenā mea. E leʻi avea aʻu ma Molimau a Ieova ae o le taimi nei o loo oʻu suʻesuʻeina le Tusi Paia ma i latou, ma ou te taumafai lava e auai i a latou sauniga.”