Lipoti a Ē Faalauiloa le Malo

“E Matuā Fou i Laʻu Faalogo!”

E IAI se faifeʻau faataimi atoa a Molimau a Ieova i Polani e igoa iā Dorota, na ō ma lana tama tama e 14 tausaga e vaai le fomaʻi i le aʻoga, ma o se asiasiga e masani ona la faia. A o siaki lana tama e le fomaʻi e suafa iā Janina,a na fesili le fomaʻi iā Dorota po o ā feʻau a lana tama e fai i le fale.

Na tali atu Dorota: “E saunia e laʻu tama le taumafataga i le afiafi a lo matou aiga e toʻaono pe a faapea e lē mafai ona ou faia. E na te tapenaina foʻi le fale ma faaleleia nisi o mea o le fale. E fiafia tele o ia e faitau tusi. O le toaga ia i le aʻoga.”

Na faapea atu Janina: “Ou te ofo! Ua atoa nei le 12 tausaga talu ona ou faigaluega i inei, ae ou te leʻi faalogo lava i se mea faapena.”

Na iloa e Dorota o se avanoa lelei lea e molimau atu ai, o lea la, na faapea atu ai: “O le toʻatele o mātua i aso nei, e latou te lē toleniina lelei a latou fanau. O le māfuaaga lenā e masani ai ona manatu faatauvaa le fanau iā i latou lava.”

Na fesili atu Janina: “E faapefea ona e iloa lenā mea? O le toʻatele o mātua e augapiu ma so latou iloa o lenā mea.”

Na tali atu Dorota: “E maua lenā manatu i le Tusi Paia, o se tusi e tāua tele. O se faaaʻoaʻoga, e tusa ai ma le Teuteronome 6:6-9, o le aʻoaʻoina o a tatou fanau, e amata muamua lava i le aʻoaʻoina o i tatou lava. Pe e lē tatau ea ona tāmau muamua i o tatou loto ma mafaufau, ia amioga ma tapulaa ia tatou te mananaʻo e aʻoaʻo atu iā tatou fanau?”

Na tali atu Janina: “O se manatu ina a manaia!” Ona ia fesili atu lea iā Dorota pe faapefea ona fesoasoani le Tusi Paia iā te ia i le tausia aʻe ma le aʻoaʻoina o lana fanau.

Na faapea atu Dorota: “E matou te suʻesuʻeina le Tusi Paia i vaiaso taʻitasi ma la ma fanau. E ma te faaaogāina le tusi e taʻua Fesili ua Fesili Mai ai Talavou—Tali e Aogā.”b Ona ia faamatalaina lea o le tusi ma nisi o mataupu o loo iai.

Na tali atu Janina: “E matuā fou i laʻu faalogo! Pe mafai ona ou vaai i le tusi?”

Ina ua mavae le itula, ona toe foʻi atu lea o Dorota ma le tusi.

A o matamata Janina i le tusi, na fesili atu o ia: “O le ā lau tapuaʻiga?”

“O aʻu o se tasi o Molimau a Ieova.”

“O le ā le auala e feagai ai Molimau a Ieova ma tagata e ese a latou lotu?”

Na tali atu Dorota: “Latou te feagai i se auala faaaloalo, e pei o la ta talanoaga i le asō.” Ona toe faapea atu lea o Dorota: “Ae matou te naunau lava ina ia latou iloa le upu moni o le Tusi Paia.”

Na taʻutino atu Janina: “Ua ese ma le lelei o oʻu faalogona.”

I le faaiʻuga o lana asiasiga, na faalaeiau e Dorota ia Janina ina ia faitau i le Tusi Paia. “O le a e olioli ai i lou olaga ma fesoasoani foʻi i lau galuega.”

Na faapea atu Janina: “Ua e faalaeiauina tele aʻu e faitau i le Tusi Paia.”

Ona o lona magafagafa ma lona maumauaʻi, na faaaogā ai e Dorota se asiasiga masani i le fomaʻi e avatu ai se molimau lelei.—1 Peteru 3:15.

[Faamatalaga pito i lalo]