Pe e Iai se Taimi o le a Tatou Olioli ai i le Saogalemu Moni?
E FIAFIA tagata uma e vaavaai i le taaalo fiafia o tamaiti ma o latou mātua alolofa a ea? E lagona e tamaiti le saogalemu atoatoa pe a iai o latou mātua alolofa. Peitaʻi, o le toʻatele o tamaiti talavou, e faigatā ona maua ni taimi fiafia faapena. Na i lo o lea, o nisi tamaiti, e popole lava i aso uma po o fea o le a moe ai mo le pō. Po o iai se faamoemoe mo na tamaiti o ē e leai ni saogalemu?
E ui e lē o manino mai le lumanaʻi, ae ua saunia e le Afioga a le Atua se faamoemoe. Na valoia e le perofeta o Isaia o le a oo mai le aso o le a nonofo ai tagata uma i le saogalemu atoatoa. Na ia tusi e faapea: “Latou te faia fale, ma latou mau ai; latou te totō tovine, ma latou aai i o latou fua. Latou te lē fai fale ina ia mau ai nisi; latou te lē totō ina ia ʻai ai nisi.”—Isaia 65:21, 22.
Ae po o lelei ona faavaeina lea faamoemoe? O le upu “faamoemoe,” e lē faaalia mai ai le mautinoa i taimi uma. O se faaaʻoaʻoga, i Pasili, e i ai se faaupuga masani e faapea: “A esperança é a última que morre.” O lona uiga, “O le faamoemoe o le mea mulimuli lava lea e mavae.” Ua faaalia i lenei mea, e toʻatele lava tagata e tumau pea ona iai lo latou faamoemoe e tusa lava pe leai se faavae moni. Ae peitaʻi, e ese le faamoemoe lea e faasalafa mai e le Atua mo i tatou. Na tusia e le aposetolo o Paulo e faapea: ‘Auā ua faapea mai le Tusi, E lē mā se tasi e faatuatua i le Atua.’ (Roma 10:11) O valoaga o le Tusi Paia ua uma ona faataunuuina, ua faamautinoa mai ai iā te i tatou e faapea, o le a faataunuuina foʻi isi folafolaga uma lava na faia e Ieova le Atua. Pe a faataunuuina moni na folafolaga, o le a mavae atu loa tulaga ia e māfua ai ona nonofo tamaiti i auala.
E oo foʻi i aso nei, o le fautuaga aogā lea e maua i le Tusi Paia, e mafai ona fesoasoani iā i latou o ē ua siliga se faamoemoe ina ia faaleleia o latou olaga ma maua le saogalemu moni. E faapefea ona faia o lenā mea? O le a fiafia Molimau a Ieova i lou vaipanoa e fesoasoani atu iā te oe i le saʻilia o tali i lenei fesili.