Taumafataga—E Lē na o se Taimi e Taumamafa Ai!

E FIAFIA tagata uma i se taumafataga manaia. E lē gata ina taumamafa, ae o le talatalanoa foʻi i mea e atiaʻe ai ma aufaatasiga māfana ma tagata e te alofa i ai. Ua avea foʻi lenā ma taimi fiafia e faamalieina ai e lē na o le fia taumafa. Ua fai ma masani a le toʻatele o aiga le faapotopoto faatasi, a itiiti mai e faatasi i le aso mo se taumafataga. O le taimi o taumafataga, ua maua ai e aiga le avanoa e talatalanoa ai i mea na tutupu i le aso po o ni fuafuaga. O mātua e faalogologo i manatu ma faalogona o a latou fanau, latou te iloa mafaufauga ma faalogona o a latou fanau. A o mavae atu taimi, o aufaatasiga fiafia ma toʻafilemu na olioli ai i taimi o taumafataga, ua atiaʻe ai i le aiga le lagona saogalemu, maufaatuatuaina, ma le alofa lea ua atili faamausalī ai le liʻo o le aiga.

I aso nei, ua faigatā mo aiga ona faapotopoto faatasi mo se taumafataga ona o le pisi ma tele o mea e fai a le toʻatele o tagata o aiga. I aganuu a nisi atunuu, e lē fiafia i le aai faatasi o se aiga pe talatalanoa i taimi o taumafataga. Ua fai ma masani a isi aiga le ki o le TV i le taimi o le taumafataga, ua matuā lē mafai ai ona faia sa latou talanoaga uigā.

Ae peitaʻi, o mātua Kerisiano, e nofouta pea mo avanoa e atiina aʻe ai o latou aiga. (Faataoto 24:27) I aso ua leva, na taʻu atu ai i mātua e faapea, o se tasi o avanoa e sili ona lelei e aʻoaʻo ai le afioga a le Atua i a latou fanau, o le taimi lea ‘pe a nonofo i o latou fale.’ (Teuteronome 6:7) O le nonofo i lalo e lē aunoa ma fanau i le taimi o taumafataga, ua maua ai e mātua se avanoa lelei e atiaʻe ai i a latou fanau le alofa loloto mo Ieova ma ana mataupu silisili amiotonu. O le atiina aʻe o se siʻomaga fiafia ma toʻafilemu, e mafai foʻi ona avea ai le taimi o taumafataga ma taimi e fiafia ma atiina aʻe ai lou aiga. Ioe, ia avea le fai taumafataga, e lē na o se taimi e taumamafa ai, ae o se taimi aogā!