Le Tusi Paia Berleburg

O LE Pietism, o se lotu fou na aliaʻi mai, mai le lotu Luteru i Siamani i lona 17 ma lona 18 o senituri. Sa tauemua ma sauāina nisi o lenei lotu ona o lo latou faatuatuaga. Na maua e nisi tagata Pietist se lafitaga i Berleburg, pe tusa ma le 100 maila [150 kilomita] i mātū o Frankfurt am Main. Na saunia se puipuiga mo i latou i Berleburg e Count Casimir von Wittgenstein, o se tasi e taualoa i le nuu, ma e faatāuaina le lotu. O le iai o nei tagata talaʻi ma tagata atamamai i Berleburg, na iʻu ai ina maua se faaliliuga fou o le Tusi Paia, e pei ona iloa ai i aso nei o le Tusi Paia Berleburg. Na faapefea ona maua lea faaliliuga?

O se tasi na saʻili mo se lafitaga, o Johann Haug, o lē na tuua faamalosi lona aiga i Strasbourg, ona o le lē fiafia o le ʻaufailotu o le nuu iā te ia. O Haug, o se tagata atamai ma e tomai i le tele o gagana. Sa ia faailoa atu i isi tagata atamamai i Berleburg e uiga i lona faanaunauga moni “e saunia se faaliliuga e saʻo atoatoa o le Tusi Paia, ia maua ai le uiga moni ma saʻo aʻiaʻi e tusa ai ma le Afioga a le Atua, ma le agaga moni na tusia ai, ina ia faasaʻo ai le faaliliuga a Luteru.” (Die Geschichte der Berlenburger Bibel [Le Talaaga o le Tusi Paia Berleburg]) O le sini, o le saunia lea o se Tusi Paia e iai ni faamatalaga e faamalamalama ai, ma ia malamalama ai tagata lautele. Na talosagaina e Haug le fesoasoani a isi tagata atamamai o le Tusi Paia mai isi atunuu o Europa, ma e 20 tausaga na ia galue ai i lenei Tusi Paia. Na amata ona lomia le Tusi Paia Berleburg i le 1726. Talu ai le tele o ona faamatalaga faaopoopo, na oo atu ai i le valu tusi o lea Tusi Paia.

O loo iai ni mea mataʻina i le Tusi Paia Berleburg. O se faaaʻoaʻoga, ua faapea mai le Esoto 6:2, 3: “Ua fetalai mai foʻi le Atua iā Mose, o loo faapea mai iā te ia, O aʻu nei o le ALII! Na iloa aʻu e Aperaamo/ma Isaako ma Iakopo/o le Atua e ona le malosi uma lava: a e peitaʻi o loʻu igoa o IEOVA, na leʻi iloa ai aʻu e i latou.” Ua faapea mai se faamatalaga puupuu i lenei mau: “O le suafa o IEOVA, . . . , o le suafa ua faaesea/po o/le suafa iloga.” O le suafa o Ieova, o loo aliaʻi mai foʻi i ni faamatalaga i le Esoto 3:15 ma le Esoto 34:6.

E na o le Tusi Paia Berleburg lava mai le tele o Tusi Paia Siamani na faaaogāina ai le suafa o Ieova, a lē i le Tusi Paia, o faamatalaga i le pito i lalo, po o isi faamatalaga. O se tasi o faaliliuga faaonapōnei o loo sili ona faamamaluina ai le suafa o le Atua, o le New World Translation of the Holy Scriptures, ua lomia e Molimau a Ieova.