O Ai o le a Fagaina Tagata?

E TUSA ai ma le fua faatatau na faia e le World Food Programme, o se faalapotopotoga a Malo Aufaatasi o loo galulue e taofia le lē lava o mea taumafa, e 800 miliona tagata ua matelāina, o le toʻatele o i latou o tamaiti. Talu ai nei lava, na faapea mai ai lenā faalapotopotoga, o alāmanuia a atunuu atiaʻe lea sa mafai ona fesoasoani i lenei tulaga, ua faaaogāina i isi faafitauli, e pei o faiga faatupu faalavelave. Ua faateteleina le faafitauli ona o faamaʻi pipisi. Ua taʻua i se lipoti a le Global School Feeding e faatatau i atunuu o Aferika o loo matuā pipisi ai le AIDS: “Ua maliliu se augātupulaga o mātua ona o le AIDS. Ona ua maliliu o latou mātua, e manaʻomia ona latou saʻilia mea e ola ai, ae o le toʻatele, e lē iloa ona fai ni faatoʻaga ma e leai se poto masani i le olaga, lea ua masani ona iloa mai o latou mātua.”

Ua faaauilumaina e le World Food Programme se fuafuaga i aʻoga ina ia saunia ai a itiiti mai, o le tasi le ʻaiga i le aso. O lenei fuafuaga e lē gata e faaitiitia ai lea faafitauli, ae na amata ai isi polokalame ina ia taofia ai le pipisi atu o le HIV/AIDS i talavou.

I atunuu na faia ai nei polokalame, na maua ai e tamaiti meaʻai, aʻoaʻoina i le tumamā, ma isi mea. Ua mātauina foʻi atunuu ua suia ai tulaga tau amio, ua faaitiitia ai aafiaga o le HIV/AIDS.

E faanoanoa ai, ona e lē o aveesea atoatoa i taumafaiga a tagata nei mea. Peitaʻi, ua aumaia e le Tusi Paia se folafolaga faamāfanafana loto e faatatau i le vaifofō tumau o le matelāina. Ua taʻua i le Salamo 72:16: “E taumafa o saito i le nuu i tumutumu lava o mauga.” I le Malo o le Atua, o le a mafai ona faapea atu tagata iā Ieova le Atua: “Ua e asiasi i le laueleele, ma e faasūsūina lava . . . ua e saunia a latou saito ina ua faapea ona e sauni i ai.”—Salamo 65:9.

[Faamatalaga i Ata i le itulau 32]

WFP/Y. Yuge