Ua Pei o se Maa Tāua Lanu Mūmū

NA ILOA e le aposetolo o Ioane se faaaliga i se nofoālii mamalu i le lagi. O Lē na tiʻetiʻe i le nofoālii, sa “pei o le maa iasepi.” Sa tino mai foʻi o ia e pei “o le salikea” po o se maa tāua lanu mūmū. (Faaaliga 4:2, 3) O ā na maa tāua?

O nei maa, e lē o ni maa mafiafia e iila mai na o le pito i luga. I aso anamua, o le upu Eleni lea sa faaliliuina i le “iasepi,” sa faamatala ai maa felanulanuaʻi eseese, e aofia ai ma maa tāua e pei o ni tioata. Ua taʻua e A. T. Robertson i le tusi, Word Pictures in the New Testament, O le “maa iasepi” i le Faaaliga 4:3, “e mautinoa lava, e lē o le maa iasepi taugofie lea e maua i aso nei.” E lē gata i lea, ua faamatalaina e Ioane mulimuli ane i le tusi o Faaaliga le aai faalelagi, o Ierusalema e faapea: “O lona pupula foʻi e pei o se maa tāua lava, e pei o se maa iasepi i lona faatioata mai.” (Faaaliga 21:10, 11) O maa ia na taʻua e Ioane, e foliga mai, sa pei o maa tioata, sa mafai ona susulu mai ai se malamalama.

O lē na vaaia i le faaaliga a Ioane o loo nofo i le nofoālii, o Lē e aupito sili ona mamalu i le vateatea aoao, o Ieova le Atua. E matuā sili atu ona mamā ma paia o ia. O lea, na tusi ai le aposetolo o Ioane e faatatau i lenā mea: “O le malamalama lava le Atua, a e leai lava se pōuliuli o iā te ia.” (1 Ioane 1:5) I lea, na uunaʻia ai e Ioane ona uso talitonu ina ia ‘faamamāina i latou, faapei ona mamā o Ieova.’—1 Ioane 3:3.

O le ā e tatau ona tatou faia ina ia mamā ai i tatou i le silafaga a le Atua? E matuā talafeagai lava lo tatou faatuatua i le toto maligi o Iesu Keriso mo le faamagaloina o a tatou agasala. E tatau foʻi ona tatou “savavali [pea] i le malamalama” e ala i le suʻesuʻeina e lē aunoa o le Tusi Paia ma ola e ōgatusa ma ana aʻoaʻoga.—1 Ioane 1:7.