O le ā le Faavae o Lou Olaga?

E FAALAGOLAGO le malosi o se fale i lona faavae. I nisi taimi, ua faasino atu e le Tusi Paia lenei mea moni i se uiga faafaatusa.

O se faaaʻoaʻoga, ua faasino atu e Isaia iā Ieova le Atua o lē na “faavaeina le lalolagi.” (Isaia 51:13) O le uiga o lenei faavae faafaatusa o tulafono e lē masuia a le Atua, lea e puleaina le fegasoloaʻiga o le lalolagi ma taofiofia ai i lona tulaga. (Salamo 104:5) O loo faamatalaina foʻi i le Tusi Paia mea o “faavae” aʻe ai olaga o tagata. O lona uiga, o le faia o mea tonu, tulafono ma le tausisia o na tulafono. Pe a “fulisia faavae” ona o faiga lē tonu, faiga faapiʻopiʻo ma faiga sauā, e lē toe sologa lelei ai se mea.—Salamo 11:2-6; Faataoto 29:4.

E faatatau atu foʻi lenei mea moni i tagata taʻitoʻatasi. I le faaiʻuga o lana lauga i le mauga, na fetalai Iesu: “Ai sē faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa; ona to mai lea o uaga, ua oo mai foʻi tafega, ua agi mai foʻi o matagi, ua pesi mai i lea fale, a e leʻi paū lava ia; auā ua faavaeina i luga o le papa. Ai sē faalogo foʻi i aʻu upu nei, a e lē faia, e faatusaina o ia i le tagata valea, na na faia lona fale i luga o le oneone; ona to mai lea o uaga, ua oo mai foʻi tafega, ua agi mai foʻi o matagi, ua pesi mai i lea fale, ona paū ai lea, ua nutipalaina lava.”—Mataio 7:24-27.

O le ā le faavae o lou olaga? Po o faavae aʻe i le oneone, o aʻoaʻoga a tagata e lē talitonu i le Atua, lea e iʻu ina lepetia ai lou faatuatua? Po o faavae i luga o le papa, o le usiusitai i fetalaiga a Iesu Keriso, lea e mafai ona e sao ai mai faigatā e pei o ni afā?