Ua Tauia se Malaga Umi

NA LIPOTIA mai Congo se ʻauso tamaʻitaʻi e toʻalua na faia se malaga umi i le nofoaga na gāpā ai le taua, ina ia auai i le Tauaofiaga Itumalo “Ia Avatu i le Atua le Viiga” i Lisala. E ese mai faatonuga faaleagaga ma le aufaatasiga faa-Kerisiano sa la faamoemoe e olioli ai, na la fia feiloaʻi atu foʻi i sui mai le ofisa o Molimau a Ieova i Kinshasa. Ona o le taua mataʻutia lea sa faia i le atunuu, na la lē toe vaaia ai nisi mai le ofisa mo ni tausaga, na la mananaʻo ai loa e faaaogā le avanoa lea, e feiloaʻi atu ai iā i latou.

Na faimalaga atu lenei ʻauso i se vaa mai lo la nuu o Basankusu agaʻi atu i Lisala, ma o se faigāmalaga pe ā ma le 200 maila (300 kilomita) le mamao, e ui atu i le vaomatua ma sopoʻia ai ni vaitafe se lua. E tolu ni vaiaso na faimalaga ai. Talu ai o i laʻua uma o ni tagata talaʻi faataimi atoa, na auauna le isi mo tausaga e 3 a o le isi e 19, na la folafola atu ai le tala lelei o le Malo i isi i lenei malaga. Na la talaʻi atu e tusa ma itula e 110 i tagata na la feiloaʻi ai, ma tufatufaina sāvali e 200 ma mekasini e 30.

A o ui atu i le vaitafe, na la folau atu ai i le va o ni puaa sami ma korokotaila o ni mea e masani ai i lenā vaipanoa. E leʻi mafai ona la sopoʻia atu le vaitafe i le pō—e leai se malaga seʻiloga ua ao! Na la pāsia foʻi nofoaga e siaki ai fitafita.

Na fiafia lenei ʻauso e faia a la taumafaiga, e ui o se faigāmalaga umi ma vaivai. Na la faagaeetia ma olioli i le auai atu i lenei tauaofiaga i Lisala. Na faatumuina o la loto i le maelega mo le upu moni, ma na faalaeiauina i laʻua i le aufaatasiga o uso ma tuafāfine e 7,000 na auai atu. Ina ua uma le tauaofiaga, na la toe fesagaʻia foʻi luʻi ia i lo la toe taliu atu, ae na la taunuu lava ma le manuia ma le saogalemu i o la aiga.