Po ua Lē Mafai Ona Taofia Mea Leaga?
Na sii aʻe i luga e se tamaitiiti se mea mai se laufanua, peitaʻi o se pomu. Ua tauaso nei ma mumutu vaega o lona tino. Na tuulafoaʻi e se tinā sana pepe faatoʻā fanau mai ma nanā i se lapisi i autafa o le alatele. Na toe foʻi se tama i le fale sa faigaluega ai ma tafana tagata sa ia tau atu ai, ona ia fana lea o ia lava. Na faileagaina faaleituaiga e se tamālii ni tamaiti ua leai so latou puipuiga malu.
O LE itu e faanoanoa ai, ua matuā faateleina i o tatou aso tala i nei gaoioiga leaga. O le mea e sili ona faanoanoa ai, o nei lipoti e masani ona ō faatasi ma tala i fasiotiga tagata i va o ituaiga ma lanu, ma faiga faatupu faalavelave. Na taʻua i se lomiga i le 1995: “O le itu e sili ai ona leaga, o le senituri lenei a Satani. E leʻi faaalia e tagata i se isi taimi ua teʻa atu ni faanaunauga e fasiotia le faitau miliona o isi tagata ona o lanu, lotu, po o ituaiga.”
I le taimi e tasi, ua faapolusioneina e tagata le ea, faatamaʻia le lalolagi, faaitiitia mea o loo maua ai, ma toeitiiti lē toe maua ai isi ituaiga o meaola. Pe mafai e tagata ona foʻia nei mea leaga uma ma faia ia sili atu le lalolagi e avea o se nofoaga saogalemu? Pe atonu e tai tutusa lea i le taumafai e liligi ni vai i se pakete o loo mama? Na taʻua e se polofesa o lē na tele ina tusi e uiga i mataupu i mea leaga o loo tutupu: “Ou te matuā manaʻo e faia se suiga i le lalolagi ina ia faaleleia. Ae e lē o agaʻi i se lelei le lalolagi.” Atonu o lou manatu foʻi lenā.
Ua faatusa le auala o loo agaʻi ai le lalolagi i se vaa o loo folau i le sami fesouaʻiina ma lamatia i aso taʻitasi. E ui e leai se tasi e fia alu i lenā itulagi, ae e lē o taulau manuia taumafaiga ina ia suia le ala. E agaʻi atu pea le vaa i le itulagi e agi mai ai le afā, e lē mafai ona taofia.
I se isi itu, o lenei tulaga ua faasolo ina leaga, o se vaega o le lē lelei atoatoa o tagata. (Roma 3:23) Ae foliga mai ua sili atu le tele ma le faaauau pea ona tutupu o mea leaga, na i lo faanaunauga leaga o loo i tagata. Pe moni ea la ua faasesēina tagata e sē e faapogaia mea leaga, e lē o vaaia ma e malosi? Afai e moni, o ai le pogai ma e faapefea ona puipuia ai i tatou? O le a talanoaina i le mataupu o sosoo mai nei fesili.
[Faamatalaga i Ata i le itulau 3]
© Heldur Netocny/Panos Pictures