“A Oo Ina Ulusinā, e Latou te Fua Mai Pea Lava”

O LE toʻatele o tagata i atunuu o le Metitirani, e latou te totōina le pama i o latou lotoā. Ua lauiloa nei laau i le matagofie ma le susua o ona fua. E lē gata i lea, e latou te fua mai pea mo le tele o tausaga.

Na faamatala faafatusolo e le tupu o Solomona le fuaitino lalelei o le teine Sulami, ua pei o se pama. (Le Pese a Solomona 7:7) O loo taʻua e le tusi Plants of the Bible e faapea: “O le upu Eperu mo le pama, o le ‘tàmâr.’ . . . O loo avea ma faailoga o le lalelei ma le matagofie i tagata Iutaia, ma e masani ona latou faaigoa ai teine.” Mo se faaaʻoaʻoga, na faaigoa le ʻafa tuafafine lalelei o Solomona iā Tamara. (2 Samuelu 13:1) E iai pea mātua o loo faaigoaina a latou fanau teine i lenā igoa.

E lē na o tamaʻitaʻi lalelei e faatusaina i le pama. Na pese le faisalamo: “E tupu olaola le tagata amiotonu e pei o le pama; e tupu tele e pei o le arasi i Lepanona. O ē ua totōina i le fale o Ieova, e tupu olaola i latou i lotoā o lo tatou Atua. A oo ina ulusinā, latou te fua mai pea lava; e malolosi ma lauolaola i latou.”—Salamo 92:12-14.

I se faamatalaga faafaatusa, o i latou o loo auauna ma le faatuatua iā Ieova a o matutua lava, ua pei i latou o le matagofie o le pama. Ua taʻua e le Tusi Paia, “O le pale matagofie le ulusinā, pe a ua i ai i le ala o le amiotonu.” (Faataoto 16:31) E ui lava ina fāi ifo lo latou malosi pe a matutua, ae ua mafai e i latou ua matutua ona faatumauina lo latou malosi faaleagaga e ala i le faaauau pea ona suʻesuʻeina le afioga a le Atua, le Tusi Paia. (Salamo 1:1-3; Ieremia 17:7, 8) E ave le faamalō i ē ua matutua ona o a latou upu alofa ma faaaʻoaʻoga lelei, lea ua avea ai i latou ma puna o faalaeiauga i isi ma faaauau pea ona fua mai i lea tausaga ma lea tausaga. (Tito 2:2-5; Eperu 13:15, 16) I le pei o le pama, e mafai e tagata matutua ona fua mai pea lava i o latou tausaga matutua.