Ia Mafuta Atu i le Atua
Faamatalaina e Ieova o Ia Lava
O LE a faapefea ona e faamatalaina le Atua—i ona uiga ma ona ala? Seʻi faapea ua e fesili atu i le Atua e faatatau iā te ia, ona faalogologo atu lea a o ia faamatala mai ona uiga. O le mea lenā sa tupu i le perofeta o Mose. O le itu e faafetai ai, ona na faagaeeina o ia e faamauina le mea na tupu.
I le mauga o Sinai, na talosaga atu ai Mose iā Ieova e faapea: “Ia e faaali mai iā te aʻu lou mamalu.” (Esoto 33:18) I le aso na sosoo ai, na maua ai e le perofeta le faaeaga e faailoa mai i ai le faaātaga o le mamalu o le Atua.a E lē o faamatalaina auʻiliʻili e Mose le mea na ia vaai i ai i le vaaiga ofoofogia. Nai lo lea, na ia faamauina se mea e sili atu ona tāua—o fetalaiga a le Atua. Seʻi o tatou iloiloina le fetalaiga a Ieova lea e maua i le Esoto 34:6, 7.
O le mea muamua na faailoa mai e Ieova e faatatau iā te ia, e faapea o ia “o le Atua alofa mutimutivale ma le alofa fua.” (Fuaiupu e 6) E tusa ai o le faamatalaga a se tasi o faitofā o le Tusi Paia, o le upu Eperu ua faaliliuina i le “alofa mutimutivale,” o loo faatatau atu i le Atua i lona “alofa faapelepele, e pei ona alofa faapelepele o se tamā i lana fanau.” O le upu ua faaliliuina i le “alofa fua,” e fesootaʻi atu i se veape lea e “faamatala ai se tagata ua uunaʻia e lona loto, ina ia fesoasoani atu i se tasi o loo manaʻomia se mea.” E manino mai, e finagalo Ieova ia tatou iloa e na te tausia ona tagata tapuaʻi e pei ona tausia e mātua a latou fanau—i le alofa faapelepele ma le manatu mamafa mo o latou manaʻoga.—Salamo 103:8, 13.
Ona sosoo ai lea ma le fetalai mai o Ieova e faapea “e telegese lona toʻasā.” (Fuaiupu e 6) E lē itagofie o ia i ana auauna o i le lalolagi. Nai lo lea, e onosai o ia iā i latou, e onosaia o latou vaivaiga a o tuu atu le taimi iā i latou e suia ai o latou ala agasala.—2 Peteru 3:9.
Ua faaauau ona fetalai mai le Atua e ala i le faapea mai “e tele le alofa ma le faamaoni.” (Fuaiupu e 6) O le alofa o se uiga tāua ua atiina aʻe ai e Ieova se faiā e tumau i le va o ia ma ona tagata. (Teuteronome 7:9) E lē gata i lea, o Ieova o le puna o le faamaoni. E lē mafai ona faasesē atu o ia, pe faasesēina foʻi o ia. Talu ai o ia o le “Atua faamaoni,” e mafai la ona tatou faatuatua atoatoa atu i mea uma e fetalai ai o ia, e aofia ai ma ana folafolaga mo le lumanaʻi.—Salamo 31:5.
O le isi mea moni tāua e finagalo Ieova ia tatou iloa e faatatau iā te ia, e na te faamagalo i le “amiolētonu ma le solitulafono ma le agasala.” (Fuaiupu e 7) E na te “faamagalo sala” a tagata agasala ua salamō. (Salamo 86:5) I le taimi e tasi, e lē manatu māmā Ieova i mea leaga. Ua ia faamatala mai e faapea “e lē faasaoina lava e ia o ē agasala.” (Fuaiupu e 7) O le a faasalaina e le Atua e paia ma amiotonu, i latou o ē e agasala ma le loto i ai. E sau se aso o le a tauia ai i latou i a latou amioga sesē.
O le faamatalaina mai e Ieova o ona uiga, o se faailoaga manino lea o lona finagalo ia tatou iloa o ia ma faamasani i ona uiga ma ona ala. Po ua lē uunaʻia ai ea oe e aʻoaʻoina atili e faatatau i ona uiga matagofie?
[Faaopoopoga i lalo]
a E leʻi vaai moni lava Mose iā Ieova, auā e leai se tagata e mafai ona vaai i le Atua ma ola pea. (Esoto 33:20) Ae e manino mai na avatu e Ieova iā Mose se vaaiga e faatatau i Lona mamalu, ma fesootaʻi mai iā te ia e ala i se agelu.