E Mafai Ona E Iloa le Suafa o le Atua

O se faaeaga le valaaulia o oe e faafeiloaʻi ma talanoa atu i se tagata tāua i le taʻua o lona suafa. E masani ona taʻua tagata tāua i o latou faalagiga, e pei o “Lau Afioga le Peresitene,” “Lau Afioga,” po o “Lau Afioga Mamalu.” O lea, pe a manaʻo se tagata maualuga e te taʻua o ia i lona igoa, e mautinoa lava e te mitamita i lenā faaeaga.

UA TAʻU mai e le Atua moni iā i tatou i lana Afioga tusia, le Tusi Paia e faapea: ‘⁠O aʻu o Ieova. O loʻu igoa lenā.’ (Isaia 42:8) E ui ina tele ona faalagiga e pei o “Lē na faia mea,” “Lē e ona le malosi uma,” ma le “Alii Pule Silisili Ese,” ae ua ia faamamaluina ana auauna faamaoni ona ua mafai ona latou taʻua lona suafa pe a talanoa atu iā te ia.

O se faaaʻoaʻoga, na ōle atu le perofeta o Mose i le Atua i le faapea atu: “Faamolemole Ieova e.” (Esoto 4:10) I le faapaiaga o le malumalu i Ierusalema, na amata e le tupu o Solomona lana tatalo i lenei faaupuga: “Ieova e.” (1 Tupu 8:22, 23) Ma ina ua talanoa atu le perofeta o Isaia i le Atua mo le nuu o Isaraelu, na faapea atu o ia: “O oe Ieova e, o lo matou Tamā.” (Isaia 63:16) E manino mai, ua valaaulia i tatou e lo tatou Tamā i le lagi, ia taʻua lona suafa pe a talanoa atu iā te ia.

E tāua le taʻua o le suafa o Ieova pe a talanoa atu iā te Ia, ae e iai isi mea e aofia ai i le iloaina o lona suafa. Ua folafola mai e Ieova e uiga i lē e alofa ma faatuatua iā te ia: “Ou te puipuia foʻi o ia ona ua ia iloa loʻu igoa.” (Salamo 91:14) E manino mai, e tele mea e aofia ai i le iloaina o le suafa o le Atua, ona o se vala tāua lea i le mauaina o lana puipuiga. O le ā la e manaʻomia ona e faia ina ia iloa ai le suafa o Ieova?