O Ai Moni Lava Iesu Keriso?

“A o ulu atu o ia i Ierusalema, ua vevesi le aai atoa ma faapea ane: ʻO ai ea lenei tagata?’ A ua fai atu pea le motu o tagata: ʻO Iesu lenei, le perofeta mai Nasareta i Kalilaia!’”​—MATAIO 21:10, 11.

AISEĀ na avea ai le taunuu ane o Iesu Kerisoa i Ierusalema i lenā aso o le tau e totogo ai mea o le 33 T.A. ma māfuaaga o le vāvāō o tagata? Na logotala le toʻatele i mea ofoofogia na faia e Iesu, ma na latou faamatala atu pea i isi. (Ioane 12:17-19) Peitaʻi, e latou te lē o iloa o loo latou faatasi ma lē o le a soo le lalolagi atoa i ana taaʻiga, e oo mai lava i o tatou aso!

Seʻi tagaʻi i ni faaaʻoaʻoga o le auala ua aafia ai tagata ona o Iesu.

▪ E faavae le faitauina o taimi i kalena o loo faaaogā i le tele o le lalolagi, i le tausaga ua manatu na soifua mai ai Iesu.

▪ E tusa ma le lua piliona tagata—po o le tasi vaetolu o le faitau aofaʻi o le lalolagi—ua faapea mai o Kerisiano.

▪ E sili atu i le piliona tagata lotu Isalama i le lalolagi aoao, ma ua latou aʻoaʻoina o Iesu, o se “perofeta e sili atu iā Aperaamo, Noa, ma Mose.”

▪ O loo faaaogā i talanoaga a tagata i aso faisoo nisi o fetalaiga a Iesu, e pei o nei:

ʻIa liliu atu i ai le isi alafau.’​—MATAIO 5:39.

“Aiseā e te vaavaai ai i le fasilaau i le mata o lou uso, ae e te lē vaai i le utupoto o loo i lou lava mata?”​—MATAIO 7:3.

“E lē mafai ona pologa se tasi i ni matai se toʻalua.”​—MATAIO 6:24.

ʻAua neʻi lafoina a outou penina i puaa.’​—MATAIO 7:6.

“O mea uma tou te mananaʻo e faia mai e tagata iā te outou, ia faapea lava ona outou faia iā i latou.”​—MATAIO 7:12.

“Faitau tupe o le a faaalu.”​—LUKA 14:28.

E lē ma fesiligia taaʻiga a Iesu i olaga o tagata. Peitaʻi, e anoanoaʻi manatu ma talitonuga o tagata e uiga iā te ia. Ae atonu o loo e fia iloa, ʻO ai moni lava Iesu Keriso?’ Ua na o le Tusi Paia lava ua taʻuina mai le mea na afio mai ai Iesu, lona soifuaga, ma aiseā na maliu ai. O le iloa o le mea moni e uiga iā te ia, o le a iai ni taaʻiga lelei i lou olaga i le taimi nei ma le lumanaʻi.

[Faaopoopoga i lalo]