Ia Aʻoaʻo Lau Fanau
Le Māfuaaga na Alofagia ai Toreka
E TATOU te mananaʻo uma lava ia alofagia i tatou e tagata. Ae ā oe?—a O loo taʻua i le Tusi Paia Toreka, o se fafine na alofagia e le toʻatele o tagata.
Na nofo Toreka i Iopa, o se taulaga e tulata i le Sami Metitirani. Pe tusa ma le 35 maila (56 km) i saute i sasaʻe o Iopa o loo iai Ierusalema. O Toreka o se tasi o uluaʻi soo o Iesu.
Faamata o le ā le mea na matuā alofagia ai Toreka?— O loo taʻua i le Tusi Paia le tele o mea lelei na ia faia, ma meaalofa mananaia na ia avatu. Na ia faia ofu mananaia mo fafine ua oti a latou tane. Na ia faamatala atu i le toʻatele le Atua moni o Ieova, e pei ona sa faia e Iesu.
Pe e te iloa le mea leaga na oo iā Toreka?— Na maʻi o ia ma oti ai. Ua faanoanoa uma ana uō. Ona latou auina atu lea o ni tagata i le mea o nofo ai le aposetolo o Peteru, pe tusa e sefulu maila (16 km) le mamao mai i Iopa. Na talosaga tagata iā Peteru ina ia vave alu atu. Ina ua taunuu Peteru, ona alu lea i le fogāfale i luga o loo taoto ai Toreka. O loo fetagisi uma fafine, ma ua latou faaali atu iā Peteru ofu na faia e Toreka mo i latou.
Ona fai atu lea o Peteru i tagata ia ō ese mai le potu. E ui sa faia e Peteru ma isi aposetolo ni vavega, ae e leai se isi o i latou na faatūina se tagata mai i le oti. E te iloa le mea na faia e Peteru?—
Na tootuli o ia i talaane o le tino maliu o Toreka ma tatalo iā Ieova. Ona ia fai atu lea iā Toreka e nofo i luga, ma na ia faia faapea. Na tago atu lea o Peteru i lona lima ma faatū o ia i luga. Ona ia valaau atu lea i fafine ua oti a latou tane ma isi e ō mai e vāai iā Toreka. E lē taumatea na fiafia lava i latou uma, a ea?—
Seʻi vaai i ni lesona aogā mai i le tala e uiga i le toetū o Toreka. Ua faaalia mai ai, pe afai e te fesoasoani atu i isi, o le a alofagia foʻi oe. Ae sili atu ona tāua, e manatuaina ma alofagia oe e le Atua. E lē galo iā te ia mea lelei e te faia mo isi, ma o le a tauia oe i se olaga fiafia e faavavau, i lana lalolagi fou amiotonu.
Faitau i lau Tusi Paia
[Faaopoopoga i lalo]
a Afai o lua faitau ma se tamaitiiti, o le vase e faamanatu atu ai e mālōlō laʻitiiti, ona fai lea i le tamaitiiti e faaali mai sona manatu.