Ua Fesili Mai le ʻAufaitau . . .

Pe e tatau ona papatisoina pepe?

▪ Ua faapea mai Vitoria: “Sa ou fefe ina neʻi faapuapuagatia i Limbo loʻu tuagane laʻitiiti o Ioane.” Aiseā na fefe ai o ia? Na ia taʻua: “Na oti Ioane a o leʻi papatisoina o ia, ma na fai mai se faifeʻau Katoliko, o le māfuaaga lenā o le a faapuapuagatia ai o ia e faavavau i Limbo.” E mautinoa e taufaamataʻu lea manatu, ae pe e faale-Tusi Paia? Pe e aʻoaʻoina i le Tusi Paia o fanau uma e feoti ae e leʻi papatisoina, e faapuapuagatia i pulekatolio?

Ua aʻoaʻoina i le Tusi Paia e tatau ona papatisoina Kerisiano. Na faatonuina e Iesu ona soo e faapea: “Ia . . . fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.” (Mataio 28:19, 20) Ia matau mai, o i latou ua papatisoina e tatau ona avea ma soo o Iesu. O lona uiga, ua latou aʻoaʻoina e uiga iā Iesu ma ua filifili e mulimuli iā te ia—e mautinoa o se filifiliga e lē mafai e se pepe ona faia.

E ui lava i lea, e maumaututū le toʻatele, o loo faatatau le faatonuga a Iesu i fanau iti. Na faapea mai Richard P. Bucher, o se faifeʻau Luteru: “E tatau ona papatiso tagata uma, e aofia ai ma pepe. O le taofia o i latou mai i le papatisoina, o le a lē mafai ai ona latou maua le faamagaloga, ma e faasalaina i latou i seoli.” O le mea moni, e pe ā ma le tolu ni māfuaaga e feteenaʻi ai na faamatalaga ma aʻoaʻoga a Iesu.

Muamua, e leʻi aʻoaʻoina e Iesu e tatau ona papatisoina pepe. Aiseā e tāua ai lenā mea moni? Ia mātau: Sa naunau Iesu e aʻoaʻoina ona soo e faatatau i faatulagaga a le Atua. Na iai taimi na ia taʻua soo ai aʻoaʻoga autū. Aiseā? Ina ia mautinoa ua latou malamalama i le manatu saʻo. (Mataio 24:42; 25:13; Mareko 9:34-37; 10:35-45) Peitaʻi, e leai ma se taimi na aʻoaʻoina ai e Iesu e faapea e tatau ona papatisoina pepe. Pe faamata na galo iā Iesu ona aʻoaʻoina lenā faatulagaga? E leai! E mautinoa, pe afai na tatau ona papatisoina pepe, semanū e aʻoaʻoina e Iesu lenā mea.

Lona lua, e leʻi aʻoaʻoina lava e Iesu e faapuapuagatia se tasi pe a maliu. Na ia talitonu i Tusitusiga Paia, lea e manino ona faapea mai: “O ē ua ola ua latou iloa e oti i latou; a o ē ua oti, latou te lē iloa se mea.” (Failauga 9:5) Na iloa e Iesu e lē o faapuapuagatia ē ua maliliu i pulekatolio, Limbo, le afi i seoli, po o se isi nofoaga. Peitaʻi, na ia aʻoaʻoina e lē o toe iloa e i latou se mea, e peiseaʻī ua momoe.—Ioane 11:1-14.

Lona tolu, na aʻoaʻoina e Iesu o i “latou uma o loo i tuugamau” o le a toetutū mai. (Ioane 5:28, 29) E mautinoa, o le a aofia ai le faitau miliona o i latou e leʻi papatisoina. Pe a toetutū mai, o le a latou maua le avanoa e aʻoaʻoina ai faatulagaga a le Atua, ma ola e faavavau i le Parataiso i le lalolagi.a—Salamo 37:29.

E manino lava la, e lē o aʻoaʻoina i le Tusi Paia e tatau ona papatisoina pepe.

[Faaopoopoga i lalo]