Tali o Fesili e Sefulu e Faatatau i Feusuaʻiga

1 Po o feusuaʻiga le uluaʻi agasala na faia e Atamu ma Eva i le faatoʻaga i Etena?

▪ Tali: E toʻatele tagata ua manatu faapea o le fua o le laau na faasāina i le faatoʻaga i Etena, e faasino atu i feusuaʻiga faaleulugalii. Peitaʻi, e lē o le aʻoaʻoga lenā a le Tusi Paia.

Seʻi manatu: A o leʻi faia Eva, na faatonuina e le Atua Atamu e aua le ʻai i le fua “o le laau e iloa ai le lelei ma le leaga.” (Kenese 2:15-18) Ona e na o Atamu sa iai i lenā taimi, sa lē faasino la lenei faasāsāaga i feusuaʻiga faaleulugalii. E lē gata i lenā, sa manino le faatonuga na avatu e le Atua iā Atamu ma Eva ina “ia fanafanau ma ia matuā faatoʻateleina, ia tumu ai le lalolagi.” (Kenese 1:28) Po o se gaoioiga alofa mo le Atua le faatonu o le uluaʻi ulugalii ina ʻia faatumu le lalolagi’—lea e aofia ai le faia o feusuaʻiga faaleulugalii—ae toe faasala i laʻua i le oti ona o le usiusitaʻi i ana faatonuga?—1 Ioane 4:8.

E lē gata i lea, e leʻi faatasi Eva ma lona toʻalua i le taimi na ʻtago atu ai o ia i le fua [faasāina] ma ʻai ai.’ Mulimuli ane, “ua ia avatu foʻi le fua i lana tane ina ua la faatasi, ma ua ʻai ai foʻi ma ia.”—Kenese 3:6.

O le manatu mulimuli, e leʻi taʻusalaina Atamu ma Eva i le faia o feusuaʻiga ma maua ai ni fanau. (Kenese 4:1, 2) E manino la, o le fua o le laau na ʻai e Atamu ma Eva, e leʻi faasino atu i le faia o feusuaʻiga faaleulugalii, ae sa faasino atu i se fua moni lava o se laau.

2 Pe e faasā i le Tusi Paia le faafiafiaina i feusuaʻiga?

▪ Tali: Ua taʻua i le uluaʻi tusi o le Tusi Paia, o le Atua na faia tagata o “le tane ma le fafine.” Sa faapea mai le Atua ua “matuā lelei lava” lana foafoaga. (Kenese 1:27, 31) Mulimuli ane, na faagaeeina e le Atua se tusitala o le Tusi Paia e avatu nei faatonuga mo tane: “Ia e fiafia i lau avā na fai a o e tauleʻaleʻa . . . Ia matuā faamalieina oe i ona susu i taimi uma.” (Faataoto 5:18, 19) Pe e atagia mai i nei faamatalaga, e faasā i le Tusi Paia le faafiafiaina i feusuaʻiga?

Ua faaalia i mea moni, e lē gata e mafai ona mauaina ai fanau, ae ua faia foʻi e le Atua totogasā ina ia mafai e se ulugalii faaipoipo, ona fefaaaliaʻi lo la alofa faapelepele i se auala e faafiafiaina ai i laʻua. O feusuaʻiga faaleulugalii, e mafai ona faamalieina ai manaʻoga faaletino ma faalogona o se ulugalii faaipoipo i se mafutaga māfana.

3 Pe e faataga e le Tusi Paia le nonofo o se tamāloa ma se fafine e leʻi faaipoipo faaletulafono?

▪ Tali: Ua faailoa manino mai i le Tusi Paia e faapea: “E faamasino e le Atua o ē e faitaaga.” (Eperu 13:4) O le upu Eleni mo le faitaaga, o le por·neiʹa, e faasino atu i le faaaogāsesēina o totogasā o ē e leʻi faaipoipo.a O lea, e leaga i le silafaga a Ieova le nonofo faatasi o se tamāloa ma se fafine—e tusa lava pe afai o loo fuafua e faaipoipo.

E tusa lava po ua matuā alofa le tasi i le isi, ae e finagalo le Atua ina ia faaipoipo i laʻua a o leʻi faamalieina i feusuaʻiga. Na foafoaina i tatou e le Atua ina ia faaalia le uiga o le alofa. O le uiga autū o le Atua o le alofa. O lea la, e iai māfuaaga lelei ua ala ai ona finagalo o ia e na o ulugalii faaipoipo e mafai ona faia feusuaʻiga, lea o le a talanoaina i le mataupu o sosoo mai.

4 Pe e faataga le tele o avā a se tane?

▪ Tali: Sa iai se taimi na faatagaina ai e le Atua le tele o avā a se tane. (Kenese 4:19; 16:1-4; 29:18–30:24) Ae e lē o le Atua na amataina le faatulagaga o le tele o avā. E na o le toʻatasi le avā na ia tuuina atu iā Atamu.

Sa avatu e le Atua iā Iesu Keriso le aiā ina ia toe faafoʻisia Lana uluaʻi faatulagaga, o le tasi o le avā po o le tane. (Ioane 8:28) Ina ua fesiligia Iesu e uiga i faaipoipoga, na faapea mai o ia: “O lē na foafoaina i laʻua i le amataga, na ia faia i laʻua o le tane ma le fafine, ma na ia fetalai atu, ʻO le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi.’”—Mataio 19:4, 5.

Mulimuli ane na faagaeeina e le Atua se tasi o soo o Iesu e tusi: “Ia taʻitasi le tane ma lana avā, ma ia taʻitasi foʻi le fafine ma lana tane.” (1 Korinito 7:2) Ua faapea mai foʻi le Tusi Paia, e so o se tane faaipoipo i le faapotopotoga Kerisiano e iai ni ona faaeaga faapitoa, e tatau ona avea o ia “o se tane e toʻatasi lana avā.”—1 Timoteo 3:2, 12.

5 Pe e sesē ona faaaogā e ulugalii faaipoipo auala e taofia ai le maʻitō?

▪ Tali: E leʻi faatonuina e Iesu ona soo ina ia faia pe lē faia foʻi ni fanau. E leʻi tuuina atu foʻi e soo o Iesu se faatonuga faapena. E leai ma se vaega o le Tusi Paia o taʻusalaina ai le faia o aiga fuafuaina.

E iai le aiā a le ulugalii faaipoipo e filifili ai pe e faia sa la fanau pe leai. Atonu e la te filifili foʻi pe e toʻa fia tamaiti e mananaʻo ai, ma po o afea e la te fuafua e maua ai sa la fanau. O le filifiliga ma le tiute tauave a le tane ma le avā, le filifili pe e faaaogā auala e taofia ai le maʻitō ae lē aafia ai le faapaʻū tama.b E lē tatau ona faamasinoina e se tasi i laʻua.—Roma 14:4, 10-13.

6 Pe e sesē le faapaʻū tama?

▪ Tali: E paia le ola i le Atua, ma e oo lava i se pepe faatoʻā afuafua e silasila i ai o ia o se tagata ola. (Salamo 139:16) Na fetalai mai le Atua e faasalaina se tagata e na te faamanuʻalia se pepe e leʻi fanau mai. O lea, i lana silafaga, o le fasioti tagata le faapaʻū tama.—Esoto 20:13; 21:22, 23.

Ae faapefea pe a tupu se faalavelave faafuaseʻi i le taimi e fanau ai le pepe, lea e tatau ai i se ulugalii ona filifili po o ai e tatau ona ola, po o le tinā po o le pepe? I lenā tulaga, e tatau i le ulugalii ona filifili po o le ola o ai e faasaoina.c

7 Pe e faataga i le Tusi Paia le teteʻa?

▪ Tali: E faataga i le Tusi Paia le teteʻa. Peitaʻi, na faailoa mai e Iesu e na o le tasi le māfuaaga talafeagai e mafai ona tatalaina ai se faaipoipoga, ina ua ia faapea mai: “Ai se tasi e faateʻa i lana avā ae e leʻi faitaaga [faia feusuaʻiga i fafo o le faaipoipoga] . . . , ma toe faaipoipo i se isi fafine, ua mulilua o ia.”—Mataio 19:9.

E inosia e le Atua se ulugalii e teteʻa ona o māfuaaga faagutugutulua ma faaoleole. E faasalaina e Ieova le tagata e tuua lana paaga faaipoipo mo māfuaaga faatauvaa, aemaise lava pe afai o lona faanaunauga e manaʻo i se isi paaga.—Malaki 2:13-16; Mareko 10:9.

8 Pe e talia e le Atua faiga faatauatane?

▪ Tali: Ua faaalia manino i le Tusi Paia le taʻusalaina o le faitaaga, lea e aofia ai faiga faatauatane. (Roma 1:26, 27; Kalatia 5:19-21) Ua faamautinoa mai i le Tusi Paia e lē taliaina e le Atua lea ituaiga o olaga, ma ua tatou iloa foʻi o le “alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.

E ui lava e tatou te lē manatu māmā i faiga faatauatane, ae e ao ona faaalia e Kerisiano moni le agalelei i tagata uma. (Mataio 7:12) E finagalo le Atua ina ia tatou “āva i ituaiga uma o tagata.” O lea, e lē ʻinoʻino pe feita Kerisiano i ē e faia faiga faatauatane.—1 Peteru 2:17.

9 Pe e sesē ituaiga o feusuaʻiga e ala i upu ma ata matagā e lafo i le telefoni (phone sex ma le “sexting”), ma e ala i le initaneti (cybersex)?

▪ Tali: O le phone sex, e aofia ai le faia o talanoaga e lē talafeagai e uiga i feusuaʻiga ma faalogologo i faamatalaga e faagaee ai faalogona faaleituaiga. O le “sexting,” o le faaaogāina o telefoni feaveaʻi e lafo atu ai faamatalaga ma ata matagā i isi, e faagaee ai faalogona faaleituaiga. O le cybersex, o so o se auala e faaaogāina ai le initaneti e faia ai feusuaʻiga.

E lē o taʻua patino i le Tusi Paia auala faaonapōnei o loo faia ai feusuaʻiga. Ae o loo faapea mai: “O le faitaaga, ma amioga lē mamā uma, po o le matapeʻapeʻa, aua lava neʻi taʻua iā te outou e pei ona tatau i tagata paia, po o amioga e māsiasi ai, pe e tautala i tala valea, po o tausuaga matagā, o mea ia e lē tatau.” (Efeso 5:3, 4) O nei mea e pei o le phone sex, “sexting,” ma le cybersex, ua faasesē ai manatu o tagata e uiga i feusuaʻiga, ma uunaʻia ai tagata e saʻili i fafo o le faaipoipoga ina ia faamalieina i feusuaʻiga. Nai lo o le fesoasoani i tagata e pulea o latou tuʻinanauga i feusuaʻiga, ae ua atili ai ona uunaʻia o latou faanaunauga manatu faapito i feusuaʻiga.

10 O le ā le manatu o le Tusi Paia i le taaloalo i totogasā?

▪ Tali: E lē o taʻua patino i le Tusi Paia le taaloalo i totogasā—o le lotelote ma le loto i ai e le tagata o ona lava totogasā, ina ia faagaee ai faalogona faaleituaiga ma lagona o le tetega (seʻi tulou lava le gagana). Peitaʻi, ua faatonuina Kerisiano e le Afioga a le Atua e faapea: “O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau [lē talafeagai] i feusuaʻiga.”—Kolose 3:5.

O le taaloalo i totogasā e faagaee ai se manatu sesē ma le manatu faapito e uiga i feusuaʻiga. Ua faamautinoa mai i le Tusi Paia, o le a foaʻi mai e le Atua le “mana lea e sili atu i le malosi o tagata” iā i latou e faia ni taumafaiga faamaoni, e taofia lea masaniga.—2 Korinito 4:7; Filipi 4:13.

[Faaopoopoga i lalo]