Saʻiliga mo ni Tali

“E toetoe lava o tagata uma e eseese o latou manatu e uiga iā [Iesu], po o ai o ia. E tusa lava po o le ā le tulaga o lo tatou faatuatua po o le lē mautonu foʻi, ae e tatou te tuufesili uma lava, ʻO ai lenei tagata?’”​—LE TUSITALA O STAN GUTHRIE.

E FIA iloa e tagata po o ai Iesu. E sili ona alumia tusi, ma taʻutaʻua le tele o ata tifaga e uiga iā te ia. Peitaʻi, o loo iai pea fesili a tagata e uiga iā Iesu. E eseese manatu o tagata, po o ai moni lava o ia.

I ni nai tausaga ua mavae, na valaaulia ai e ni tusitala se toʻalua ia tagata e fai atu ni a latou tali i le initaneti i le fesili, “O ai Iesu?” O nisi la nei o tali:

● “Atonu o ia o se rapi (faiaʻoga), o lē na avea lona olaga ma faaaʻoaʻoga o le alofa.”

● “O ia o se tagata e pei o i tatou, na soifua i se olaga e sili ona mataʻina.”

● “E leai se faamaoniga e iloa ai na iai moni lava Iesu.”

● “O Iesu o le Alo o le Atua, o lē na fanau mai, maliu, ma toe faatūina mai i le oti ina ia laveaʻiina i tatou mai i le agasala. O loo soifua o ia i le taimi lenei, ma o le a toe afio mai i le lalolagi.”

● “Ou te talitonu o Iesu Keriso o le alo e toʻatasi o le Atua, o ia o se tagata, ma o ia foʻi o le atua.”

● “O Iesu ua na o se tala faafagogo mo tagata matutua.”

E manino mai, e lē saʻo nei manatu eseese o loo taatele i tagata. Po o iai se puna maufaatuatuaina o faamatalaga, e mafai ona tatou maua ai ni tali i fesili e uiga iā Iesu? E talitonu i latou na lomia lenei lomiga, o le Tusi Paia o le Afioga lea a le Atua, ma e na o le pau lea o le tusi e mafai ona taʻu maia iā i tatou upu moni atoatoa e uiga iā Iesu.a—2 Timoteo 3:16.

I le mataupu o loo sosoo mai, o le a tatou talanoa ai i tali a le Tusi Paia e tusa ai ma fesili masani e uiga iā Iesu. O ia lava na faapea mai, e mafai e “tagata uma e faatuatua iā te ia” ona maua le ala i le faaolataga. (Ioane 3:16) E matou te valaaulia oe e iloilo tali, ona filifili lea pe e manaʻomia ona e aʻoaʻoina atili nisi mea e uiga iā Iesu, ma le auala e faaalia ai le faatuatua iā te ia.

[Faaopoopoga i lalo]