Pe E te Manatua?
Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:
I le ā le itu e mafai ai ona avea Solomona ma faaaʻoaʻoga lapataʻi mo i tatou?
Na faamanuia ma faaaogāina e le Atua le tupu o Solomona. Peitaʻi, a o faagasolo le pulega a Solomona, na lē toe usiusitaʻi ai o ia i apoapoaʻiga a le Atua. Na faaipoipo atu o ia i le afafine faapaupau o Farao, faia ni avā se tele, ma sa ia faatagaina foʻi fafine faapaupau e faasolosolo lava ona taʻitaʻieseina atu o ia i tapuaʻiga sesē. E manaʻomia ona tatou ʻalofia ni uiga po o ni faanaunauga sesē o loo faasolosolo ona tuputupu aʻe. (Teu. 7:1-4; 17:17; 1 Tu. 11:4-8)—12/15, itulau e 10-12.
Aiseā e mafai ai ona tatou faapea atu o Sara o se fafine amioatua, ma o se avā tautele?
Ina ua avatu e le Atua iā Aperaamo le faatonuga e tuua Uro, sa uiga atu i le tuua o aiga, uō, ma se olaga masani ina ia ō atu i se nofoaga e leʻi iloa muamua. Peitaʻi, sa avatu pea e Sara lana lagolagosua, ma faatuatua i le Atua o le a faamanuia iā te ia. Sa ia faaaloalo iā Aperaamo, ma faaalia uiga matagofie.—1/1, itulau e 8.
Aiseā na poloaʻi atu ai Ieova iā Aperaamo e ofo atu lona atalii pele e fai ai le taulaga?
E tāua ona manatua, e leʻi faapea na faatagaina e le Atua Aperaamo e faaaogā Isaako e fai ai le taulaga. O lenā mea na tupu, o se tasi lea o auala ua faailoa mai ai le aafiaga tele na oo i le Atua, ona o le ofoina atu o lona lava Alo o Iesu, e fai ma taulaga.—1/1, itulau e 23.
E faapefea ona iloa e mai lava i le uluaʻi senituri ma faasolo mai ai, e iai pea i le lalolagi nisi o Kerisiano moni faauuina?
I le talafaatusa a Iesu e faatatau i “le saito” ma “vao,” na faasino atu “le fatu lelei” i ʻatalii o le malo.’ (Mata. 13:24-30, 38) E tutupu faatasi vao ma le saito seʻia oo i le taimi o le seleselega. O lea la, e ui lava e lē mafai ona tatou iloa i latou uma e aofia ai i lenei vasega e faaātaina e le saito, ae e iai pea nisi e oo mai i o tatou aso.—1/15, itulau e 7.
O ā mea e faasolosolo ona tutupu a o leʻi oo mai Amaketo?
O le a faalauiloa mai e atunuu se taʻutinoga tāua e faapea, “ua filemu ma saogalemu!” (1 Tesa. 5:3) O le a faasagatau faigāmalo i lotu sesē. (Faaa. 17:15-18) O le a osofaʻia tagata tapuaʻi o Ieova. Ona oo mai ai lea o le iʻuga.—2/1, itulau e 9.
E mafai faapefea ona tatou foʻia lea faanaunauga o le matauʻa?
O auala nei e mafai ona fesoasoani iā i tatou: Finafinau e atiaʻe le alofa ma le alofa faamaoni faaleuso, faifaimea faatasi ma tagata amioatua, ia saʻili e fai le mea lelei, “ia olioli faatasi ma ē o loo olioli.” (Roma 12:15)—2/15, itulau e 16-17.
O ai e tautatala i le gagana Nahuatl, ma o ā mea ua faia mo i latou?
O le gagana lenā sa tautatala ai tagata Aztec mai anamua, ma o loo faaaogāina pea e le 1.5 miliona tagata i Mekisikō. O loo talaʻi Molimau a Ieova i tagata e tautatala i le gagana Nahuatl, ma o nisi o a tatou lomiga o loo maua i lenā gagana.—3/1, itulau e 13-14.
Pe a avatu fautuaga, o ā mataupu silisili e tatau ona tatou manatua pea?
Ia iloa le tulaga moni. ʻAlofia le vave tali atu. Ia lotomaulalo e faatatauina le Afioga a le Atua. Pe a mafai, ia faaaogā lomiga faale-Tusi Paia. ʻAlofia le faia o filifiliga mo isi.—3/15, itulau e 7-9.
Na fetalai atu Iesu i lana ʻaufaalogologo ina ia ō i maila e lua. (Mata. 5:41) O le ā na uiga atu i ai?
I lenā taimi i Isaraelu, atonu sa faamalosia e taʻitaʻi Roma se tagata ina ia faia ni auaunaga. Ina ua fetalai atu Iesu i lana ʻaufaalogologo ina ia ō i maila e lua, sa uiga atu o ia i le faataunuuina ma le lotomalilie o galuega na tatau ona latou faia.— 4/1, itulau e 9.