Ua Fesili Mai le ʻAufaitau . . .

Aiseā e Talaʻi ai Molimau a Ieova Mai i Lea Fale i Lea Fale?

▪ I le Tusi Paia, e tatou te maua ai le faatonuga a Iesu na tuuina atu i ona soo e faapea: “O le mea lea, ia outou ō atu e fai tagata o nuu uma lava ma soo, . . . ia aʻoaʻoina i latou.” (Mataio 28:19, 20) Pe e faatatau atu lenā faatonuga i Kerisiano uma? Na malamalama uluaʻi soo o Iesu sa faatatau lenā faatonuga i Kerisiano uma. O se faataʻitaʻiga, na faapea mai le aposetolo o Peteru: “Na ia [Iesu] faatonuina . . . i matou e talaʻi atu i tagata ma molimau māeʻaeʻa.” (Galuega 10:42) Na tusi le aposetolo o Paulo: “O le mea lea e tatau ona ou faia. Oi talofa iā te aʻu pe a ou lē folafolaina atu le tala lelei!”—1 Korinito 9:16.

E lē gata na usitaʻia e Paulo ma Peteru le faatonuga a Iesu, ae e faapena foʻi Kerisiano i le uluaʻi senituri. Na avea le talaʻiga ma vala iloga o la latou galuega. (Galuega 5:28-32, 41, 42) O loo taumafai foʻi Molimau a Ieova i aso nei e faia faapea. O loo latou talaʻia foʻi le feʻau lava e tasi lea na talaʻia e Iesu, o “le malo o le lagi.”—Mataio 10:7.

O ai e tatau ona talaʻi atu i ai le tala lelei? Na faailoa mai e Iesu, e tatau ona talaʻi atu i tagata uma i le lalolagi atoa. Na ia faailoa atu i ona soo: “Ona fai lea o outou ma molimau iā te aʻu i . . . tuluʻiga uma o le lalolagi.” (Galuega 1:8) Na ia valoia foʻi, a o leʻi oo mai le iʻuga o le faiga o mea a lenei lalolagi, “o le a talaʻiina atu lenei tala lelei o le malo i le lalolagi atoa e fai ma molimau i atunuu uma.” (Mataio 24:14) O lea la, na faia e Kerisiano i le uluaʻi senituri ni taumafaiga ina ia talanoa atu i tagata uma, ae e lē na o tagata e masani ai, po o tagata e lē auai i ni lotu. (Kolose 1:23; 1 Timoteo 2:3, 4) E faapena foʻi Molimau a Ieova i aso nei, o loo latou taumafai e oo atu i tagata uma.a

O le ā le auala sili ona lelei e faasalalau atu ai le feʻau o le Malo? Na silafia e Iesu le auala e mafai ona oo atu ai le feʻau i le toʻatele e mafai ai, o lea na ia auina atu ai ona soo i aai, nuu, ma aiga o tagata. (Mataio 10:7, 11, 12) Na faaauau pea ona talaʻi soo o Iesu “mai i lea fale i lea fale,” ina ua mavae lona maliu ma lona toetū. (Galuega 5:42) Na latou talaʻi foʻi i nofoaga e maua ai tagata ma nofoaga faitele, e pei ona faia e Iesu. (Ioane 4:7-26; 18:20; Galuega 17:17) I aso nei, o loo faaaogā ai foʻi e Molimau a Ieova na lava auala, ina ia talaʻi atu ai i tagata uma.

Na faailoa mai e Iesu e lē o tagata uma o le a faalogo. (Mataio 10:14; 24:37-39) Po o le a avea lenā ma mea e taofia ai Kerisiano mai le faia o le talaʻiga? Seʻi manatu i lenei faataʻitaʻiga: Pe afai ua faatoʻā uma se mafuiʻe malosi ma o loo e iai i se vaega o le ʻau laveaʻi, po o le a taofia au saʻiliʻiliga ona e toʻaitiiti i latou na faasaoina ola? Leai, e te faaauau pea, pe afai o loo iai se faamoemoe e faasaoina le ola o se tasi. Na faatonuina e Iesu ona soo ina ia finafinau, pe afai o loo iai se faamoemoe o se tasi e talia le tala lelei e faatatau i le Malo o le Atua. (Mataio 10:23; 1 Timoteo 4:16) O le talaʻi atu mai i lea fale i lea fale e saʻilia nisi faapena, ua faaalia ai le alolofa o Molimau a Ieova i le Atua, faapea ma o latou tuaoi o ē o loo faalagolago le faasaoina o o latou ola, i le faalogo ma talia le feʻau o le Malo.—Mataio 22:37-39; 2 Tesalonia 1:8.

O le lomiga o loo e faitauina, o loo faailoa mai ai lenā feʻau o le Tusi Paia. Mo nisi faamatalaga, faamolemole talanoa atu i Molimau a Ieova i se isi taimi e toe asiasi atu ai, pe tusi atu foʻi i a i latou na lomia lenei mekasini.

[Faaopoopoga i lalo]