Faileagaina o Fafine — Lomiga Faale-Tusi Paia I LE INITANETI

Faileagaina o Fafine

“E lē fia avea aʻu o se fafine, pe a ou vaai i le auala o loo faileagaina ai i latou.”—ZAHRA, 15 TAUSAGA, mekasini o le GEO.

UA FAAILOA mai i le faamatalaga o loo i le itu taumatau, o loo tupu moni i le lalolagi le sauāina ma le faaesea o tamaʻitaʻi. Mātau manatu nei.

● Faaesea o tamaʻitaʻi. I atunuu Asia, e sili atu ona mananaʻo mātua i ni fanau tama nai lo o teine. Na iloa mai i se lipoti a Malo Aufaatasi i le 2011, e pe ā ma le 134 miliona tamaʻitaʻi e lē o iai i le faitau aofaʻi o tagata o na atunuu, ona sa faapaʻūina, fasiotia, pe e tuulafoaʻiina foʻi.

● Aʻoaʻoga. I le lalolagi aoao, e sili atu ona tele tausaga e aʻoʻoga ai alii, nai lo o tamaʻitaʻi.

● Faiga Faasoesa Faaleituaiga. E silia ma le 2.6 piliona fafine o loo i atunuu, e lē o se solitulafono le faia faamalosi e tane o feusuaʻiga i a latou avā.

● Soifua mālōlōina. I atunuu tauatiaʻe, e taʻilua minute ma maliu se fafine o loo maʻitaga, po o le taimi foʻi e fanau ai, ona o le leai o ni polokalame tau soifua mālōlōina.

● Aiā tatau. E ui e silia ma le ʻafa o fanua o le lalolagi o loo galueaʻiina e fafine, ae o le tele o atunuu, e leai se aiā faaletulafono a fafine e pulea ai fanua.

Aiseā ua lē maua ai e fafine na ituaiga o aiā? Ona o le tele o aganuu e lagolagoina pe e taʻutonuina lotu o loo sauāina ma faileagaina fafine. Na taʻua i se nusipepa i Falani le faamatalaga a se lōia mai i Initia e faapea: “E lagolago e tulafono a lotu uma le faaesea o fafine.”

Pe e te ioe i lenā manatu? Po o taʻu faatauvaa e le Tusi Paia fafine, e pei o isi tusi faalelotu? E manatu nisi, e iai mau o le Tusi Paia e foliga mai o loo taʻu faatauvaa ai fafine. Ae po o le silafaga lenā a le Atua? E ui e maʻaleʻale lenei mataupu, ae o le iloilo totoʻa o manatu o le Tusi Paia, o le a iloa ai lana silafaga i fafine.

[Ata i le itulau 3]

[Ē Ana le Ata]