TALIINA FESILI FAALE-TUSI PAIA

Pe e mafai ona e ola e faavavau?

E ui lava na soifua Atamu mo le tele o senituri, ae na aafia o ia i le tino matua ma oo atu ai i le oti. Talu mai lenā taimi, o loo saʻilia pea e tagata le tele o auala ina ia ʻalofia ai le tino matua, peitaʻi, e leai lava se tasi e mafai ona ʻalofia le oti. Aiseā? Na oo Atamu i le tino matua ma oo atu ai i le oti, ona o le lē usitaʻi i le Atua. Ua tatou aafia uma i le tino matua ona o le agasala tuufaasolo mai iā Atamu, ma o le totogi o le oti.​—Faitau le Kenese 5:5; Roma 5:12.

Ina ia tatou maua le ola e faavavau, e tatau ona iai se tasi e togiolaina a tatou agasala. (Iopu 33:24, 25) O le togiola, o se tau e totogi ina ia faasaʻolotoina ai se tasi. Ae mo i tatou, e manaʻomia le faasaʻolotoina mai le oti. (Esoto 21:29, 30) Na maliu Iesu ina ia togiolaina ai i tatou.​—Faitau le Ioane 3:16.

E faapefea ona tatou maua le ola e faavavau?

E lē o tagata uma o le a faasaʻolotoina mai i maʻi ma le tino matua. I le pei o Atamu, e mafai ona melea e tagata le ola e faavavau pe a lē usiusitaʻi i le Atua. E na o i latou e faamagaloina a latou agasala o le a mauaina le faamoemoe o le ola e faavavau.​—Faitau le Isaia 33:24; 35:3-6.

Ina ia faamagaloina a tatou agasala, e iai gaoioiga e tatau ona tatou faia. E tatau ona tatou aʻoaʻoina e faatatau i le Atua, e ala i le suʻesuʻe o lana Afioga le Tusi Paia. E tatou te aʻoaʻoina ai le auala sili e maua ai le fiafia moni i le olaga, ma le auala e maua ai le finagalo malie o Ieova, faapea le ola e faavavau.​—Faitau le Ioane 17:3; Galuega 3:19.