Pe e Manatu Mamafa Mai le Atua iā te Oe?

Pe e iai se māfuaaga na faatalitalia ai e Tavita le Atua e manatu mamafa mai iā te ia? Pe e manatu mamafa mai le Atua iā te oe? E toʻatele e faigatā ona talitonu o loo manatu mamafa mai se Atua malosi iā i latou. Aiseā?

O se tasi o māfuaaga, ona e maualuga ma mamalu le Atua pe a faatusatusa mai i le tagata. Pe a silasila mai o ia mai i lona nofoālii paia, “ua pei atunuu o sina vai e sisina ifo mai i le pakete; ua manatu i ai e pei i latou o le pefu i luga o fua faatautau.” (Isaia 40:15) Na taʻua e se tusitala e lē talitonu i le Atua, “o se matuā taufaasesē le manatu o loo iai se Atua o loo manatu mamafa mai i tagata taʻitoʻatasi.”

O se isi māfuaaga, ua manatu nisi tagata o a latou gaoioiga ua māfua ai le lē manatu mai o le Atua. O se faataʻitaʻiga, na taʻua e Jim: “E tele taimi ou te tatalo ai ia ou maua le filemu ma pulea aʻu lava, peitaʻi e lē umi lava ae toe oso aʻe loʻu ita. O le iʻuga, na ou manatu ai e lē mafai ona fesoasoani mai le Atua iā te aʻu ona o aʻu o se tagata agasala.”

Pe e mamao le Atua mai i tagata ua lē manatu mai ai? O ā ona faalogona moni i ana foafoaga lē lelei atoatoa? E lē mafai e se tasi ona taliina na fesili e aunoa ma se faamatalaga mai i le Atua. E ala mai i lana Afioga faagaeeina, ua faamautinoa mai ai iā i tatou e lē mamao o ia, ma e manatu mamafa mai iā i tatou taʻitoʻatasi ma o tatou popolega. Ua taʻua i le Tusi Paia “e lē o mamao o ia mai iā i tatou taʻitoʻatasi.” (Galuega 17:27) I mataupu e fā o loo mulimuli mai, o le a tatou talanoaina ai e manatu moni mai le Atua i tagata, ma le auala e na te faaalia ai i tagata pei o oe.