Aiseā e Tatou te Naunau ai i le Malo o le Atua?

E faitau miliona tagata i le lalolagi ua tuu atu lo latou faamoemoega i le Malo o le Atua. O loo latou mulimuli i le faaaʻoaʻoga a Iesu o lē na ia aʻoaʻo ona soo e tatalo: “Ia oo mai lou malo, ia faia lou finagalo i le lalolagi.”​—Mataio 6:10, King James Version.

O le mea e faanoanoa ai, e toʻatele tagata e naunau i le Malo o le Atua, peitaʻi e foliga mai e lē o ano i ai le tele o lotu. O le māfuaaga lea na faapea mai ai se tusitala e suafa iā H. G. Wells, e mataʻina pe a mafaufau o lea sa ave e Iesu le “faatāua . . . i aʻoaʻoga na ia faasino i ai o le Malo o le Lagi” ae o na aʻoaʻoga “e matuā itiiti lava sona tāua . . . i aʻoaʻoga a le tele o lotu Kerisiano.”

Peitaʻi e tū ese mai ai Molimau a Ieova, ona e latou te faatāuaina le Malo o le Atua. Seʻi mātau, o le lomiga o loo e faitau i ai ua lomiaina i gagana e 220. E toetoe 46 miliona kopi o lenei lomiga e lomia i masina taʻitasi, ma o le lomiga pito sili lea ona tele ona kopi ua tufatufaina i le lalolagi aoao. Ae o le ā le feʻau autū o loo iai i nei lomiga? Silasila ane i le ulutala: Le Olomatamata Faasilasilaina le Malo o Ieova.a

Aiseā e faia ai e Molimau a Ieova taumafaiga malolosi e faalauiloa le Malo o le Atua? O se tasi o māfuaaga, ona e matou te talitonu o le Malo o le Atua o le feʻau autū lea o le tusi pito i tāua i le lalolagi, o le Tusi Paia. Ae sili atu i lenā, e matou te talitonu o le Malo o le Atua ua na o le pau lea o le vaifofō o faafitauli o loo fesagaʻia e tagata.

Ua mulimuli Molimau a Ieova i le faaaʻoaʻoga a Iesu e faauaʻi tagata i le Malo o le Atua. A o soifua o ia i le lalolagi, sa avea le Malo o le Atua ma taulaʻiga autū o lona olaga ma lana galuega talaʻi. (Luka 4:43) Aiseā sa tāua ai iā Iesu le Malo o le Atua? E faapefea ona e maua aogā mai i lenā Malo? E matou te talosaga atu ia iloilo tali o na fesili mai i le Tusi Paia, lea o le a talanoaina i mataupu o mulimuli mai.