MATAUPU AUTŪ | PE E IAI MONI SE SATANI?
Pe e Iai Moni se Satani?
O se faatagata i Madrid i Sepania, o loo faaata mai ai Satani o se agelu leaga ua faatoʻilaloina
“Sa ou ola aʻe i El Salvador. Pe a ou faalogogatā i loʻu tinā, e masani ona ia faapea mai, ʻO le a sau nei le Tiapolo e puʻe oe!’ Ou te tali atu iā te ia, ʻIa fai i ai e sau!’ Na ou talitonu i le Atua ae ou te leʻi talitonu e iai se Satani.”—ROGELIO.
Pe e te ioe i le manatu o Rogelio? O lē fea o manatu o loo mulimuli mai e te talitonu i ai?
E leai se Satani; ae ua na o ia o se faailoga o le amioleaga.
E iai Satani, peitaʻi e lē aafia ai tagata iā te ia.
O Satani o se foafoaga agaga e malosi, ma e telē le aafiaga o tagata i ana taaʻiga.
Atonu e faitau miliona i latou e lagolagoina na manatu taʻitasi. Peitaʻi, pe e afāina po o lē fea o na manatu e saʻo aʻiaʻi? Afai e leai se Satani, o lona uiga ua faasesēina i latou o loo talitonu e iai moni o ia. Afai e iai Satani ae lē aafia ai tagata, e leai la se māfuaaga e fefefe vale ai fua tagata. Afai foʻi o Satani o le faitogafiti sili, o lona uiga la e sili ona mataʻutia o ia nai lo le mea o manatu i ai tagata.
Seʻi o tatou iloilo le auala o loo tali ai e le Tusi Paia fesili nei: Po o Satani ua na o se faailoga o le amioleaga, po o ia o se foafoaga agaga? Afai o ia o se foafoaga agaga, pe e mafai ona e lamatia ai? Afai o lea, e faapefea la ona e puipuia oe lava?