E Toʻatele o le a Faasaoina i le Iʻuga​—E Mafai Foʻi Ona Faasaoina Oe

Ua taʻua i le Tusi Paia o le a aofia ai i le iʻuga le faaumatiaga: “O le a tupu le puapuaga tele, e leai sona tusa talu le amataga o le lalolagi, e oo mai lava i aso nei . . . O le mea moni, a lē faapuupuuina ia aso, e leai se tagata e faaolaina.” (Mataio 24:21, 22) Peitaʻi ua folafola mai e le Atua e toʻatele i latou o le a faasaoina: “E mavae atu foʻi le lalolagi . . . , a o lē e faia le finagalo o le Atua e tumau e faavavau.”​—1 Ioane 2:17.

O le ā e tatau ona e faia pe a e fia “tumau e faavavau,” ma faasaoina mai i le iʻuga o lenei lalolagi? Pe e tatau ona e faaputu ni meafaitino pe fai nisi sauniuniga faaletino? E leai. Ua faalaeiau i tatou i le Tusi Paia e faapea: “Talu ai o le a mavae atu nei mea uma, ia outou manatunatu pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua, a o faatalitali ma tāmau i mafaufau le oo mai o le aso o Ieova.” (2 Peteru 3:10-12) Ua iloa mai i fuaiupu o loo siʻomia ai lenei mau, o “mea uma” ia o le a mavae atu, e aofia ai pulega a lenei lalolagi piʻopiʻo ma i latou uma e lagolagoina na pulega nai lo o le pulega a le Atua. E mautinoa o le a lē faasaoina i tatou mai i lenā faaumatiaga, pe afai e tatou te faaputu ni meafaitino.

O le mea moni, e aofia ai i lo tatou faasaoina le tuutoina atu iā Ieova, ma le aʻoaʻoina e faatatau i uiga ma gaoioiga e finagalo i ai o ia. (Sefanaia 2:3) Ia ʻalofia le mulimuli i le toʻatele i aso nei ma lē amanaʻia faailoga manino e iloa ai ua tatou ola i se vaitaimi tāua. Nai lo o lea, ia “tāmau i mafaufau le oo mai o le aso o Ieova.” E mafai ona faailoa atu e Molimau a Ieova mai i le Tusi Paia, le auala e faasaoina ai oe mai i lenei aso ua lata mai.