E Faapefea Ona Amata Laʻu Faitauga Tusi Paia?

O ā auala e fesoasoani ai iā te oe ina ia e fiafia i lau faitauga Tusi Paia, ma maua ai le tele o aogā? Ia mātau auala e lima ua maua ai e le toʻatele aogā.

Ia iai i le nofoaga saʻo. Ia taumafai e saʻili se nofoaga toʻafilemu. Ia faaitiitia mea e faalavelavea ai ina ia mafai ona e uaʻi i mea o loo e faitauina. Ia lelei le malamalama ma maua se ʻea mālū, lea e mafai ona fesoasoani iā te oe ina ia maua le tele o aogā mai i mea o loo e faitauina.

Ia iai se vaaiga saʻo. Talu ai o le Tusi Paia e mai i lo tatou Tamā i le lagi, o le a e maua la le tele o aogā, pe a pei oe o se tamaitiiti o loo nofosauni e aʻoaʻoina e sona matua alofa. Pe afai sa iai muamua ni ou manatu sesē e faatatau i le Tusi Paia, ia taumafai e aveese na manatu ina ia mafai ona aʻoaʻoina oe e le Atua.—Salamo 25:4.

Ia tatalo muamua a o leʻi faitau. Ua faatumulia le Tusi Paia i manatu o le Atua, o lea, e lē faateʻia i tatou i le iloaina e tatou te manaʻomia lana fesoasoani ina ia malamalama ai. Ua folafola mai e le Atua e na te foaʻi mai “le agaga paia iā i latou o ē e ōle atu iā te ia.” (Luka 11:13) E mafai ona fesoasoani le agaga paia iā te oe ina ia e malamalama ai i manatu o le Atua. A o faagasolo taimi, o le a fetālaʻi lou mafaufau ma malamalama ai “e oo lava i mea loloto a le Atua.”—1 Korinito 2:10.

Ia faitau ina ia malamalama. Aua le tau ina faitau se mataupu. Ia mafaufau i mea o loo e faitau i ai. Ia fesili ifo: ʻO ā uiga o loo oʻu mātauina e faatatau i le tagata o loo oʻu faitau i ai? E faapefea ona ou faatatauina nei faamatalaga i loʻu olaga?’

Faatutū ni sini maʻoti. Ina ia maua aogā mai i lau faitauga Tusi Paia, ia taumafai e aʻoaʻoina se vala e mafai ona matuā aogā i lou olaga. E mafai ona e faatutū ni sini faapenei: ʻOu te manaʻo e aʻoaʻo atili e faatatau i le Atua.’ ʻOu te manaʻo e faaleleia oʻu uiga, ia avea o se tane po o se avā lelei.’ Ona taumafai lea e filifili se vaega o le Tusi Paia e fesoasoani iā te oe e ausia ai na sini.a

O nei auala e lima e mafai ona fesoasoani iā te oe e amata ai lau faitauga Tusi Paia. Ae faapefea ona faateleina lou fiafia i lau faitauga Tusi Paia? O le a talanoaina i le mataupu o loo sosoo mai nisi o auala.