Pe E te Manatua?

Pe na e faitauina māeʻaeʻa lomiga fou o Le Olomatamata? Seʻi vaai pe mafai ona e taliina fesili o loo mulimuli mai:

O ā auala e fā e mafai ona faaleleia ai lou usuina o pese?

Ia tū saʻo faalelei ma tuu i luga lau tusi pese. E tatau ona e mānava faalelei. Pe a tatala tele lou fofoga ma pese malosi, o le a mafai ona e pese leotele.​—w17.11, itu. 5.

O ā itu na mataʻina ai tulaga ma auala e tau atu i aai o sulufaʻiga i Isaraelu?

E ono aai o sulufaʻiga na faatulaga lelei, ma na lelei foʻi auala e tau atu i na aai. O lea, na faigofie ai ma vave ona maua e se tagata e sulufaʻi atu i ai.​—w17.11, itu. 14.

Aiseā ua avea ai le togiola a Iesu o le meaalofa sili lea a le Atua mo tagata?

E faamalieina ai lo tatou faanaunauga ina ia ola pea, ma lo tatou manaʻoga ina ia saʻoloto mai i le agasala ma le oti. O le alofa o le Atua i ē na tupuga mai iā Atamu, na ia foaʻi mai ai Iesu a o tatou agasala pea.​—wp17.6, itu. 6-7.

Na faapefea ona faasino atu le Salamo 118:22 i le toetū o Iesu?

Na teena ma fasiotia Iesu i le avea ai ma Mesia. Ina ia avea o ia ma “maa tulimanu sili,” sa tatau ona toe faatūina mai o ia.​—w17.12, itu. 9-10.

Pe sa fesootaʻi atu le gafa na tupuga mai ai le Mesia i le tofi o le ulumatua?

Na iai taimi na ala mai ai le gafa na tupuga mai ai Iesu i se atalii ulumatua. Peitaʻi, e lē o taimi uma na tupu ai lenā tulaga. E lē o Tavita le ulumatua a Iese. E ui i lea, na ala mai iā Tavita le gafa o le Mesia.​—w17.12, itu. 14-15.

O ā ni mataupu silisili mo le soifua mālōlōina o loo i le Tusi Paia?

Na poloaʻia i le Tulafono e tatau ona faanonofo ese tagata na maua i nisi o faamaʻi. E tatau ona faamamā se tasi pe a paʻi i se tagata oti. Na taʻua i le Tulafono e tatau ona tanu otaotavale o tagata. Sa tatau ona peritomeina se pepe tama i le aso lona valu talu ona fanau mai, ona e faatoʻā mafai ona toʻa le toto o se pepe i le taimi lenā.​—wp18.1, itu. 7.

Aiseā o se mea e talafeagai ai le alofa o se Kerisiano iā te ia lava?

E tatau ona tatou alolofa i o tatou tuaoi e pei ona tatou alolofa iā i tatou lava. (Mare. 12:31) E tatau i tane ona “alolofa atu i a latou avā e pei o o latou lava tino.” (Efe. 5:28) Peitaʻi, o le soona alolofa iā i tatou lava e lē talafeagai, ona o le alofa lenā e manatu faapito.​—w18.01, itu. 23.

O ā ni auala e tatou te agaʻigaʻi ai i luma faaleagaga?

E tatau ona tatou suʻesuʻe i le Tusi Paia, manatunatu loloto i ai, ma faatatau mea o loo tatou aʻoaʻoina. E tatau foʻi ona tatou mataalia ma talia le taʻitaʻiga a le agaga paia. Ia tatou talia ma le lotofaafetai le fesoasoani mai i isi.​—w18.02, itu. 26.

Aiseā e lē avea ai le saʻili i fetu ma valovaloga ma auala e iloa ai le lumanaʻi?

E iai isi māfuaaga ae o le māfuaaga autū ona e taʻusalaina e le Tusi Paia faiga faaagaga uma.​—wp18.2, itu. 4-5.

O le ā lo tatou manatu e faatatau i le taliaina o se valaaulia mo se taumafataga?

Pe afai ua tatou taliaina se valaaulia, e tatau ona tatou taumafai e tausisi i a tatou upu. (Sala. 15:4) E lē tatau ona toe suia o tatou mafaufau e aunoa ma se māfuaaga tatau. Atonu na faia e lē o loo talimālō le tele o tapenapenaga.​—w18.03, itu. 18.

O ā ni lesona e aʻoaʻoina e uso tofia mai iā Timoteo?

Na manatu mamafa Timoteo i tagata ma na ia faamuamua mea faaleagaga. Na ia galue mamafa i le auaunaga paia ma faatatau mea na ia aʻoaʻoina. Na faaauau ona ia aʻoaʻoina o ia lava ma faalagolago i le agaga o Ieova. E mafai e toeaina ma isi ona mulimuli i lana faaaʻoaʻoga.​—w18.04, itu. 13-14.