Lipotiina o la Tatou Auaunaga i le Fanua
1 I tausaga taʻitasi e tatou te fiafia i le mauaina o le Yearbook ina ia mafai ai ona tatou faitau e faatatau i le galuega talaʻi i le lalolagi aoao. (Isa. 60:22) O tagata talaʻi uma e saosaolaumea i lenei lipoti faaletausaga. O lea, e mafai ona faailoa atu lo tatou faaaloalo mo faatulagaga faalefaalapotopotoga a Ieova ma faaalia lo tatou talisapaia o sina vaega laʻitiiti ua tatou faia, e ala i le lipotiina ma le faamaoni o la tatou auaunaga i le fanua i le faaiʻuga o masina taʻitasi. Pe e te lipotiina e lē aunoa ma le saʻo lelei lau auaunaga?
2 O Mea e Lipotiina: E na o itula atoatoa e tatau ona lipoti atu i le faapotopotoga. O se itula e leʻi atoa, e mafai ona taofi e le tagata talaʻi seʻi faaaofia i lana lipoti i le masina e sosoo ai. Ina ia saʻo lelei, e sili ona lelei pe a tusia i lalo le taimi na faaaluina, o lomiga na ofo, ma le aofaʻi o toe asiga na faia i taimi taʻitasi e tatou te ō atu ai i le auaunaga i le fanua. Ia, ona faaopoopo faatasi lea o na fuainumera i le faaiʻuga o le masina e aunoa ma lo tatou tau mafaufau po o ā ni mea na faataunuuina. O le a faigofie ona teuina na faamaumauga i le pepa Lipoti o le Auaunaga i le Fanua lea e saunia e le faapotopotoga.
3 Aua neʻi galo e faapea, e faaopoopo i isi au toe asiga, e tatau foʻi ona faitauina o ni toe asiga taimi taʻitasi e te faia ai se suʻesuʻega faale-Tusi Paia. (Our Ministry, itu. 102-103) I le faaiʻuga o le masina, e tatau ona faatumuina le pepa Lipoti o Suʻesuʻega mo suʻesuʻega faale-Tusi Paia taʻitasi na faia, ma tuuina atu faatasi ma lau pepa Lipoti o le Auaunaga i le Fanua. Pe a uma ona faatumuina ma le saʻo lelei ia pepa taʻitasi o Lipoti o Suʻesuʻega, e tatau loa ona tusia le aofaʻiga atoa o suʻesuʻega eseese faale-Tusi Paia na faia i le masina, i le tamaʻi pusa i le pito i lalo i le itu taumatau o le pepa o Lipoti o le Auaunaga i le Fanua.
4 Faamolemole ia manatua, o ou taimi i le auaunaga i le fanua, e tatau ona amata pe a amataina lau galuega molimau atu ma e faaiʻuina pe a māeʻa le fale po o le asiga mulimuli i taimi taʻitasi e te molimau atu ai. Ae peitaʻi, o le taimi e mālōlō ai pe e faia ai foʻi se taumafataga a o auai i le auaunaga i le fanua, e lē faitauina o se vaega o le auaunaga i le fanua. O i latou e taulimaina lauga i le lautele e mafai ona faitau le taimi saʻo na faaaluina i le faia o le lauga.—Tagaʻi i le tusi Our Ministry, itulau 104, palakalafa 1.
5 Talu ai e tatau i le failautusi ona auina atu i le Sosaiete le lipoti o le auaunaga i le fanua a le faapotopotoga i le aso ono o le masina e sosoo ai, e tāua ai la mo tagata talaʻi taʻitoʻatasi ona tuuina atu lana lipoti i le faaiʻuga o le masina. O tagata talaʻi taʻitoʻatasi o ē e felagolagomaʻi ma nei faatulagaga faalefaalapotopotoga, e mafai ona maua le lotomalie i le iloa ua faia sona sao i le faia o se lipoti saʻo lelei i le galuega i le lalolagi aoao a Molimau a Ieova. (Faatusatusa i le Esekielu 9:11.) Seʻi o tatou tuuina atu uma lava ia lipoti ua saʻo lelei o le auaunaga i le fanua i le taimi faatulagaina!