Pusa Fesili
● A o leʻi faamaonia mo le papatisoga, o le ā le mamao e tatau ona auai se tagata talaʻi e leʻi papatiso i le faiva i le fanua?
O se tasi ua agavaa o se tagata talaʻi e leʻi papatiso ua maeʻa ona faataʻitaʻia i auala eseese lona faanaunauga malosi ia avea ma Molimau a Ieova. (Sala. 110:3) Ua aumaia e se suesuega tinoū o le Tusi Paia se suiga i ona manatu, uiga, ma auala o le olaga. I le pupusa aʻe o se faanaunauga mai le loto e faafiafiaina Ieova ma faia Lona finagalo, ua lē aunoa ona auaumea faatasi ai sea tagata aʻoga filigā o le Tusi Paia ma tagata o Ieova i sauniga a le faapotopotoga, fonotaga, ma tauaofiaga. (Epe. 10:24, 25) E ese mai le auai e lē aunoa i na aufaatasiga Kerisiano, ua faapea foi ona uunaia o ia mai le loto e folafola i lumamea lona faatuatua i le ofoina o tali i sauniga, ma atonu foi ua lavea o ia i le Aʻoga o le Faiva Faatiokarate.—Sala. 40:9, 10; om itu. 73.
A talia loa e se tagata aʻoga o le Tusi Paia le upu moni ma faaalia na te sapaitalia moni le tāua o le feau o le Malo, ona ia te ia loa lea o le faaeaga o le auai i le faiva mai lea fale ma lea fale. (Mata. 24:14; 28:19, 20; om itu. 111) I lenei fesootaiga, ua i ai uma i le tagata talaʻi o taulimaina le suesuega ma toeaiina le avega tauave mamafa e faamautinoa ua ōgatasi le olaga atoa o le tagata aʻoga ma mataupu silisili Kerisiano. E tatau ona ia te ia se faanaunauga moni e avea ma Molimau a Ieova ma sapaitalia le faaeaga o le auai i le talaʻiga o le Malo ma le galuega o le faia ma soʻo.—Kala. 6:6; w 6/1/89 itu. 29; om itu. 98-99, 174.
E lē tau manaomia se taimi umi mai le taimi na agavaa ai se tagata aʻoga o le Tusi Paia e auai ma i tatou i le faiva ona mafai lea ona ia tuuina atu ia lava mo le papatisoga i le vai. I le lena taimi ua maeʻa ona ōgatasi atoatoa lona ala o le olaga ma mataupu silisili Kerisiano, peitai e lē lava lona tomai i le faiva i le lautele. E tatau ona ia faaaluina se taimi tele e faaalia ai lona mautinoa maumauai e faia se sao faifai pea ma le maelega i le faiva i le fanua.—Sala. 40:8; Roma 10:9, 10, 14, 15.
I le taimi ua nofo sauni le tagata mo le papatisoga, atonu o le a lē aunoa ona ia fetufaai le tala lelei ma isi, faaaluina e sili atu i le na o se itula po o le lua i le auaunaga i le fanua i masina taitasi. (w-E 6/1/84 itu. 8 pala. 2) Ioe, e tatau ona autaluina aiaiga totino o tagata taitasi ua talosaga e papatiso, iloiloina totoa talaaga, tausaga, tapulaa, ma isi. O le a mananao toeaiina e mulimuli i le faatonuga ua aumaia mo i latou i le itulau 175 o le tusi Our Ministry. “O lo tatou faanaunauga o i latou o ē ua liliu atu loto ia Ieova ma ē ua malamalama i le uiga o upu moni faavae o le Tusi Paia. Faatasi ma la outou lagolagosua alofa, o le a faalaeiauina ma fesoasoani ai ia i latou na papatiso e ulu atu i le faiva Kerisiano, ua lava ta oso e faamaeʻaina lena tofiga tāua.”—Mata. 16:24; Ioane 4:34; 1 Pete. 2:21.