Amata ma Faaiʻu Sauniga i le Taimi Tonu
1 O sauniga uma lava a le faapotopotoga, e aofia ai ma faatasiga mo le auaunaga i le fanua, e ao ona amata ma faaiʻu i le taimi tonu. Aiseā? O le tausisi i le taimi e atagia ai le maopoopo ma faaalia ai le manatu mamafa mo i latou uma o loo auai ma tofu sao i sauniga. (Fai. 3:17e; 1 Kori. 14:33) E mafai ona faaalia lo tatou manatu mamafa e ala i le pipii i taʻiala o loo mulimuli mai e faamautinoa ai ua amata ma faaiʻuina sauniga i le taimi tonu.
2 E ao ona tatou taumafai e lē aunoa e vave taunuu i le sauniga ina ia mafuta faatasi ai ma isi, vaaia mataupu e tatau, ma auai i le pese ma le tatalo amata. O le tulaga masani, e lima minute ua faaavanoa mo le pese ma le tatalo. E ao ia i latou e fai ma sui o le faapotopotoga e faia tatalo ona teu i manatu le faamoemoe o le sauniga ma ia atagia mai lea i a latou faaupuga i le tatalo amata ma le tatalo faaiʻu. E lē manaomia ona faaumiumi na tatalo.
3 Sauniga i le Lautele: E faatapulaa lauga lautele i le 45 minute. A ova ma le taimi faatagaina o le a aafia la le Suesuega o Le Olomatamata o loo mulimuli mai. O ia sauniga e lua, e aofia ai pese ma tatalo, e tatau ona maeʻa i itula e lua. E ao i le failauga i le lautele ona pipii i le taimi ua faaalia i le auivi a le Sosaiete ma aua le faaaofia ai fua i le lauga isi mau gaogaosa, e pei o faafeiloaiga. Afai e lē iloa e le failauga le mea e tu ai le Maota o le Malo, e ao ona ia fesiligia le faapotopotoga o loo talimalo mo ni faasinoga ma le taimi e taunuu atu ai.
4 Suesuega o “Le Olomatamata”: E tasi le itula ua faatulagaina mo le Suesuega o Le Olomatamata, faatasi ai ma le faitauina o palakalafa uma ma le iloiloina o fesili autalu. E ao i faasinoga amata ma puupuu a le taʻitaʻi, ona faaosofia ai le naunau ma tataʻi, atu ai i le lesona. O ana faaopoopoga ma manatu e faatutū i le taimi o le suesuega e ao ona faatapulaa. O le vaevaeina o le mataupu e tusa ma le taimi o le a fesoasoani lea i le taʻitaʻi e alofia ai le faaaluina o le taimi tele i le afa muamua o le lesona ae iʻu ane ua faanatinati i le afa mulimuli.
5 Aʻoga o le Faiva Faatiokarate: E 45 minute o lenei sauniga. E ui ina e lē taofia le lauga o faatonuga ma manatu tāua mai le faitauga Tusi Paia pe a uma le taimi, ae e tatau i uso ua tofia i ia vaega ona tausisi i lo latou taimi ua faatagaina. Afai e lē faia faapea, e ao ona avatu i ai se fautuaga tau o ia. E ao foi i fautuaga ma manatu o le ovasia o le aʻoga ona tausisi i le taimi ua faatulagaina. E mafai ona faasaoina le taimi pe afai e nonofo uma i latou e fai a latou lauga e latalata i le pulelaa ma pe afai e taitoatasi ma vave faaiʻuina lana lauga pe a uma le taimi tofia.—Vaai le Faasologa o le Aʻoga o le Faiva Faatiokarate mo le 1991.
6 Sauniga o le Auaunaga: E 45 foi minute o lenei sauniga. A tuu faatasi ma le Aʻoga o le Faiva Faatiokarate ma pese ma tatalo, e lē tatau ona ova le polokalama atoa i le tasi le itula ma le fasefulu lima minute. O uso e fai a latou vaega i le Sauniga o le Auaunaga e ao ona pipii i le taimi tofia. O vaega e ufitia i fesili ma tali e na o se faatomuaga puupuu lava e manaomia. E lē manaomia ona faaopoopo fua i ai ni upu tomua lavelave. E ao ona faaaʻoaʻo lelei faataʻitaʻiga, ma e ao ona sauni lelei i latou e faia ma iai i se tulaga e faaogā tatau ai le taimi ua tofia mo le vaega.
7 Suesuega Tau Tusi a le Faapotopotoga: E tasi le itula o lenei sauniga, e aofia ai le tatalo amata ma le tatalo faaiʻu. E tatau ona faitauina palakalafa uma. Ina ia mautinoa le faaiʻuina o le sauniga i le taimi tonu, o le a vaevaeina e le taʻitaʻi le mataupu ina ia alofia ai le faatopelau i le vaega mulimuli o le lesona po o vave maeʻa foi. E manaomia e le taʻitaʻi ona faautauta i le tele o le taimi e faaaluina i palakalafa taitasi. E ao ona matuā faamanino lelei manatu autū. O le tomai o le taʻitaʻi e aʻoaʻo atu e mafai ai ona ia faafetaiaʻia so o se luʻi i lenei tulaga.—Tito.1:9.
8 Faatasiga mo le Auaunaga i le Fanua: E lē tatau ona ova atu ma le 15 minute ia faatasiga, e aofia ai le faia o tofiga mo le oganuu ma faaiʻuina i le tatalo. Ua mananao i latou e ō i le auaunaga e vave amata la latou galuega i le fanua i le vave e mafai ai. O le a amata e le taʻitaʻi le faatasiga i le taimi tonu, ae lē faatuatuai seia auai se vaega toatele. E faapena foi, a uma loa ona faia tofiga o le oganuu ma faaiʻuina le faatasiga i le tatalo, e mafai loa ona tuumuli atu le vaega i le fanua. E faapitoa lava ona tāua o lenei mea i paeonia o ē atonu o loo auai.
9 O i tatou uma lava e mafai ona maua aogā mai sauniga e amata ma faaiʻuina i le taimi tonu. E faapitoa ona sapaitalia lenei mea e i latou e iai paaga lē talitonu o ē o loo faatalitali maia i latou e oo atu i le fale i se taimi ua faatulagaina. A fuafuaina se taavale e ō ai i le sauniga ma toe taliu atu ai, pe taʻu foi i ai le taimi latou te toe foi atu ai i le fale, e ao ia i latou e ō mai i aiga fevaevaeai ona manatu e tau ai foi ma le taimi lea latou te manaomia a o leʻi amataina ma faaiʻuina sauniga e mafuta ai ma isi, aveina o lomiga ma isi mea. E lē tau fesiligia, o le amataina ma le faaiʻuina o sauniga i le taimi tonu e saosaolaumea lea i le faia o mea uma ia “matagofie ma le sauni lelei.”—1 Kori. 14:40.