Pusa Fesili

● Aiseā e fautuaina ai le galulue faatasi o tagata talaʻi ma le faapotopotoga e ana le oganuu o loo latou nonofo ai?

E tāua tele le faia o mea i se auala maopoopo ma faatiokarate. Na tusia e le aposetolo o Paulo: “Auā o le Atua, e le o le Atua ia o le faasoesa, a o le filemu. . . . Ia faia mea uma lava ma le matagofie ma le sauni lelei.—1 Kori. 14:33, 40.

A o atonu o loo iai nisi o faatagaga ona o le faafaigatā o feōaiga, faasologa o galuega totogi, po o le manaoga mo se fesoasoani i le vaavaaia, ae masani lava ona sili atu le lelei o le auai i le faapotopotoga e ana le oganuu o loo tatou nonofo ai. O le a atili ai ona faigofie lenei mea mo le auaunaga i le fanua, ma o le a tatou lē tau ō mamao ai e galulue ma se vaega i tua atu o lo tatou vaipanoa. O le a tuua ai i tatou i se tulaga e sili ona lelei ina ia galulue ma isi i la tatou faapotopotoga ma faasino ai ē fou e naunau i sauniga e sili ona faigofie mo i latou. Ma e mafai ai foi ona tatou felataʻi ma isi uso ma tuafafine i lo tatou nofoaga o ē e mafai ona fesoasoani mai ia i tatou i taimi e manaomia ai.

E tatau ona tatou alofia le agaga fia tutoatasi ae tausia faamuamua faanaunauga o le Malo, i le galulue e tusa ma faatatauga ua faia. (Luka 16:10) Afai e faatuina se faapotopotoga fou pe toe faatulaga se Suesuega Tau Tusi a le Faapotopotoga, atonu o le a sili ia i tatou le nonofo pea i le mea o loo iai a tatou uo. Peitai i le taliaina o le faatatauga fou, e mafai ai ona tatou maua ni uo fou ma faalauteleina ai a tatou aumea faatiokarate. O le a faafaigofie foi, mo toeaina ona leoleoina le lafu ma faaleleia ai le tulaga faaleagaga o le faapotopotoga pe afai e nonofo tagata talaʻi i totonu o le oganuu a le faapotopotoga o loo latou auai atu i ai.