Pusa Fesili
◼ E mafai faapefea ona faaalia le olioli e i latou e auai i le papatisoga?
O le papatisoga o se faatasiga olioli. Tatou te fiafia e vaaia ē fou ua latou tutū i le itu a Ieova, ma faaalia i le lautele lo latou faatuatua. (Sala. 40:8) Na fetalai Iesu faapea sa avea lea o se mea e olioli tele ai le lagi. (Luka 15:10) E faapitoa lava ona olioli sui o aiga ma tagata talaʻi o ē sa suesue ma i latou o le a papatiso i le vaai atu i ē fou o uia lenei laasaga matuā tāua. Ae e mafai faapefea ona faaalia sea olioli i se auala tatau?
Ua faataatia e le papatisoga o Iesu se faaaʻoaʻoga mo papatisoga faa-Kerisiano i aso nei. Sa ia talisapaia faapea o se laasaga uigā ma le matuā tāua lea sa lē toe mamao ona ia uia. Na tatalo o ia a o papatisoina. (Luka 3:21, 22) Sa ia silafia faapea o le papatisoga o se taimi lea e mafaufau loloto ai ma manatu mamafa ai. Na iloa foi e ona soʻo le tāua o le papatisoga. Mulimuli ane i le liligiina ifo o le agaga paia i le aso o le Penetekoso 33 T.A., e tusa ma le 3,000 na papatisoina ai. O le ā le tali atu a le au soʻo o ē na molimauina lena mea na tupu? “Ua tumau pea i latou i le mataupu a le au aposetolo, ma le mafuta faatasi, ma le tofitofiga o le areto, ma talotaloga.” (Galu. 2:41, 42) Sa manatunatu le au soʻo i mea faaleagaga ma feofoai e talimalo i le tasi ma le isi.
Ua avea papatisoga ma faatumutumuga o fonotaga faa-Kerisiano i aso nei. E mautinoa le tatau ona faaalia o lo tatou olioli e ala i le patipati ma faamālō atu pe a tatou vaaia tagata taitoatasi ua latou tutū mo Ieova. I le isi itu, o le faaalia o le soona feei e lē pulea, le faʻaili, le talotalo atu o lima i luga o ulu o isi, ma tau valaau atu i igoa, e lē talafeagai. O na amio e faaalia ai le leai o se talisapaia mo le uigā ma le paia o lenei faailoaga o le faatuatua. E lē o se taimi talafeagai foi lea e faaalialia vale ai le avatuina o fugalaau po o isi meaalofa i ē papatiso a o latou manu aʻe mai le vai. O le papatisoga e faailoga ai le amataga o le tausinioga faa-Kerisiano mo le faaolataga. E mafai ona tatou olioli ma faalaeiauina i latou o ē papatiso e ala i le fesoasoani atu ia i latou e talisapaia se faiā vavalalata ma Ieova lea ua tatalaina mai e le papatisoga mo i latou.
O le nofoaga o le papatisoga e lē o se nofoaga tatau lea mo tausuaga, taaloga, taelega, po o isi amioga o le a aveesea ai le uigā o le faatasiga. E ao ona faaalia lo tatou olioli i se auala aloaia. O le a saosaolaumea lo tatou pulea ma le uigā i le olioli o i latou uma o loo auai.