Pusa Fesili

◼ Pe e ao ona tatou telefoni atu i le Sosaiete ina ia maua mai ai ni tali mo fesili faale-Tusi Paia po o ni fautuaga totino?

E toatele tagata latou te faaaogāina le telefoni e faavave ai ona faia mea, ae e masani lava ona aafia ai e sili atu i le na o le faavave. I le lalolagi, o se mea masani le tuu o le faamuamua i mataupu totino a le tagata lava ia; ua alofia e tagata le faia o ni a latou taumafaiga malolosi.

Maeu se eseesega ua tatou maua mai i fautuaga a le Atua! Ua ia uunaia i tatou ina ia saili mo le poto e pei o se oloa lilo, lea e faaalia ai e manaomia ona tatou naunau e faia ni taumafaiga ina ia faamalosia ai i tatou. Ua faamaonia i mea tutupu faapea o le faia faapena, e iʻu ai i le maua o le loto malie e sili atu ona tumau.—Faata. 2:1-4.

Ua fetaui lelei na taumafaiga pe a mapuna aʻe se fesili a o tatou sauniuni mo le faia o se sao i sauniga, pe tatou te fesagaʻi foi ma se faafitauli totino. Na i lo o le telefoni atu i le Sosaiete, o le a tatou maua ni aogā pe a faia ni a tatou suesuega totino i le Tusi Paia ma a tatou lomiga, ae maise lava le Watch Tower Publications Index, faatasi ai ma ona faasino mau ma mataupu tāua o le Tusi Paia.

Pe a uma ona tatou ‘saili mo oloa lilo,’ e mafai ona tatou talanoa atu i toeaina o le faapotopotoga pe afai o tatou manaomia pea se fesoasoani. E tele le poto faale-Tusi Paia o loo iai i toeaina ma e tomai foi i le sailia o faamatalaga. O le a aogā faapitoa lava la latou fesoasoani paleni pe afai o tatou manaomia se fautuaga e uiga i se faafitauli po o le faia o se filifiliga totino, auā e mafana tele i latou ia i tatou ma iloa foi o tatou tulaga.—Faatusatusa i le Galuega 8:30, 31.

Afai e foliga mai e tele pea ni faamatalaga o manaomia saʻo mai le Sosaiete, e masani lava ona lelei le auina atu o se tusi. E mafai foi ona fesoasoani toeaina i le saunia o lenei tusi. O se tusi faapena o le a lava ai se taimi e faia ai ni suesuega mo se tali faamalie loto, lea e masani ona lē mafai ona tuuina mai i le na ona telefoni atu.