Pusa Fesili

◼ Pe talafeagai le toe lolomi o tusi a le Sosaiete mo le tufatufaina atu i isi?

I le gasologa o tausaga, ua lomia ai e le Sosaiete le anoanoai o lomiga e talanoaina ai le toetoe lava o vala uma o le poto faale-Tusi Paia. O tagata o ē ua latou aʻoaʻoina le upu moni i tausaga e leʻi leva atu, atonu e manatu ua latou misia ni mea aogā mai lomiga o taimi ua tuanai ma ua lē toe mafai ona maua mai na lomiga mai le Sosaiete. O nisi ua oo atu lava i le tulaga ua latou toe faaaogā ai ni kopi o lomiga ua leva, a o isi ua latou manatu o le a toe faia e i latou lava ni kopi o lomiga a le Sosaiete i ni auala eseese ina ia faaaogā ai. Ua aofia ai le toe lolomi o lomiga ma toe faagaoioia uma i komepiuta. I nisi tulaga, ua faia lenei gaoioiga ina ia maua ai ni faasiliga tautupe.

O loo nofouta le “auauna” faamaoni i o tatou manaoga faaleagaga, ma foai mai ‘i le taimi tatau.’ (Mata. 24:45) Pe a iai se manaoga mo le toe lomia o se mataupu na muai lomia i taimi ua tuanai, ona faia lea e le Sosaiete fuafuaga mo lena faiga. Mo se faaaʻoaʻoga, ua toe lomia ina ia maua e tagata uma tuufaatasiga o Le Olomatamata faa-Peretania mai le 1960 e oo i le 1985. Peitai, pe a muai faia e tagata taitoatasi a latou lava gaoioiga ina ia toe lolomi ma tufatufa atu nei lomiga, ona mapuna aʻe loa lea o faafitauli lē talafeagai.

E mapuna aʻe faigata matuiā pe a toe lolomi ma tufatufa atu nei lomiga ina ia maua ai ni tupe. Ua taʻua i le Pusa Fesili i La Tatou Faiva o le Auaunaga o Iuni 1977 e faapea: “E sili ona lelei ia lē faaaogāseseina auaufaatasiga faatiokarate, e ala i le lē faia i totonu o le Maota o le Malo, i suesuega tautusi a le faapotopotoga, ma fonotaga a tagata o Ieova, ni fefaatauaiga po o le faalauiloaina atu o le faatauga o ni oloa po o ni auaunaga ina ia maua ai ni lelei tau pisinisi. O le a fesoasoani lenei ia i tatou ina ia matuā uaʻi atu ai i manaoga faaleagaga e pei ona tatau i ai, ae tuu ai gaoioiga faapisinisi i lona tulaga tatau.” O lea la, e tāua lo tatou alo ese mai le alu atoa o o tatou mafaufau ina ia maua ni tupe faasili pe a faia faapisinisi le Afioga a le Atua po o isi mea e fesootai atu i ai.