Faaalia le Lē Faailoga Tagata i La Tatou Faiva
1 Na faapea mai Peteru: “E le faalogaina tagata e le Atua; a e peitai o le mataʻu ia te ia . . . ma fai le amiotonu ua talia i latou e ia.” (Galu. 10:34, 35) I aso nei, o loo faia la tatou faiva faatasi ma lo tatou iloa lelei o le upu moni e pei ona taʻua. O le mea lea, e tāua tele ai lo tatou taumafai e alofia so o se faafitauli e ono faalavelavea ai le faaooina atu o le tala lelei i tagata uma.
2 A o tatou talaʻi i lea fale ma lea fale i nisi oganuu, e masani lava ona tatou feiloai ai ma tagata e lē tautatala pe malamalama i le gagana o loo faaaogā i le tatou faapotopotoga. O nisi latou te lē maua atoatoa aogā o le feau o le Malo lea tatou te talaʻiina atu, ona o le faafitauli tau i gagana. O nisi o i latou na, o tagata e logonoa, o ē e mafai ona fesootai i ai e ala i le faia o ni taga e malamalama ai. O le ā e mafai ona faia ina ia manumalo mai ai i lea faafitauli, o loo taofia i tatou mai le sailia o nei tagata ma faaoo atu i ai ma le uigā le tala lelei?
3 I le 1991, na tuuina atu ai e le Sosaiete pepa S-70a, Foreign Language Follow-up Slip, i faapotopotoga uma lava i le Iunaite Setete. O le fuafuaga o lena pepa o le fesoasoani lea ina ia mautinoa o le a maua e tagata o ē e lē mafai ona tautatala i le gagana a le faapotopotoga lea e ana le oganuu o loo latou nonofo ai, le feau o le Malo i la latou lava gagana. E aofia ai ia i latou nei, tagata e faaaogāina gagana e fai i taga.
4 Pe afai e te maua se tagata faapena e logonoa pe lē malamalama foi i le gagana o loo faaaogāina e le faapotopotoga, e ao ona e faatumuina ia manino lena pepa. E ao ona faatumuina lenei pepa e tusa lava pe e lē faaalia se naunau i le upu moni. Atonu e te lē manatua pea i taimi uma le igoa o le tagata, ae e ao ona tusi sau lisi o tuatusi ma le gagana e tautala ai. E tuuina le pepa i le pusa o loo iai lipoti mo le auaunaga i le fanua i le Maota o le Malo. O le a aoina e le failautusi pepa, siaki po o saʻo ona faatumu ma lafoina atu loa i le faapotopotoga pito i lata i ai po o le vaega foi o loo latou vaaia ia ituaiga o tagata.
5 I nisi tulaga e lē manaomia ai nei pepa. Mo se faaaoaoga, o le tele o faapotopotoga i le Iunaite Setete e tautatala i le gagana faa-Sepania, ua latou iloa lelei lava nofoaga o loo nonofo ai ē tautatala i lea gagana. Ae i le isi itu, o tagata e na o le tasi se gagana e tautatala ai e nonofo solo i isi vaipanoa. O le faapotopotoga po o se vaega o loo tautatala i lea gagana atonu e manaomia ona latou galueaiina nei oganuu e tele ma latou te talisapaia foi se fesoasoani i le sailia o tagata atonu o le a mafai ona latou fesoasoani i ai.
6 Afai e leai se faapotopotoga po o se vaega i lena oganuu e mafai ona avatuina se molimau i le gagana o loo manaomia, atonu o loo iai se tagata talaʻi i se tasi o faapotopotoga a le atunuu na te iloaina le gagana ma e mafai ona ia taulimaina lea asiga. Afai e leai se tasi e maua e mafai ona tautala i le gagana e tusa lava po ua uma ona talanoaina ma le ovasia o le aai, e ao lava i uso i lena faapotopotoga ona faia ni taumafaiga e sili atu latou te mafaia ina ia iloa ai ua tuuina atu se molimau. O le polosiua o le Olioli i Le Ola i Le Lalolagi e Faavavau! ua faamaonia lona aogā i ia tulaga.
7 E ao i tagata talaʻi taitoatasi uma ona mataala i le faaaogāina o nei pepa e pei ona manaomia. Afai e lē o maua i le faapotopotoga ia pepa (S-70a) e ao ona tusia se talosaga ma auina atu e pei ona faamatala atu i luga. E ala i ni taumafaiga malolosi e faaoo atu ai le tala lelei i tagata uma e tusa lava po o le ā la latou gagana, o le a tatou faaatagia atu ai le alofa o lo tatou Atua, o Ieova, “o lē finagalo ina ia faaolaina o tagata uma lava, ma ia oo ina iloa lelei le upu moni.”—1 Timo. 2:4.