Fesoasoani i Isi ia Malamalama e Uiga ia Iesu
1 I le avea o i tatou ma molimau mo Ieova ma Iesu, tatou te fiafia ai e faamatalaina atu i tagata le mea o fai mai ai le Tusi Paia e faatatau i “le Atua moni e toatasi” ma Iesu Keriso. (Ioa. 17:3) O se vaega tāua o la tatou galuega talaʻi, o le faamatilatilaina lea o le matafaioi tāua a Iesu Keriso, ma ia fesoasoani atu i tagata ina ia malamalama i lona tulaga moni i le la faiā ma Ieova.
2 Ona e talu ai tatou te talisapaia le manatu faapea, o loo fenuminumiai le toatele naunau o tagata e faatatau ia Iesu, i le po o ai o ia, ma pe faapefea ona aafia ai o ia i fuafuaga a le Atua, ua mafai ai la ona tatou fesoasoani ia i latou ina ia latou malamalama i le upu moni e faatatau ia Iesu, a o faia la tatou galuega talaʻi i lenei masina. Pe mafai la faapefea ona tatou fesoasoani atu i na tagata loto naunau, ina ia faasaʻoina o latou lē malamalama e uiga i le Atua ma Keriso?
3 Pe afai sa e tuu ai le sāvali “O Ā Mea e Talitonu i ai Molimau a Ieova?” i lau uluai asiasiga, atonu la o le a e toe foi atu ma faapea atu i ai:
◼ “Ua ioeina e Kerisiano e faapea, o Iesu Keriso, o ia lea ua ia tatalaina le auala mo i tatou ina ia tatou maua ai le faaolataga. Pe e te manatu ea, e tāua le iloaina o le mea na fetalai i ai Iesu e faatatau i lona tulaga? [Faataga mo se tali.] Seʻi mātau mai le mea na ia fetalai i ai i le Ioane 17:3. [Faitau.] O lea la, e matuā tāua ai tele ona tatou iloaina, e uiga i le Atua ma Iesu Keriso, talu ai o loo aafia ai lo tatou lumanai e faavavau.” Ona mafai loa lea ona e faasino atu i nisi o faamatalaga e uiga ia Iesu, i le palakalafa e 4 i le itulau e 2 o le sāvali. Ona talanoaina lea o le palakalafa muamua, i lalo o le tamai ulutala “Le Malo o le Atua” i le itulau e 3, o i inā o loo faamatilatilaina mai ai le filemu o le a aumaia e le Malo o le Atua. Ona e faataatia lea o le faavae mo se isi asiasiga, e ala i le talanoaina o isi palakalafa e lua o loo sosoo atu ai, ma fesiligia le fesili o loo i le amataga o le pakakalafa e lua i le itulau e 4, ina ia mafai ona e taliina i le isi au asiasiga o sosoo ai.
4 Afai sa naunau le tagata o le aiga e fia iloa atili e uiga i le Atua ma Keriso, ma sa ia taliaina le polosiua o le “Tolutasi,” atonu e te faapea atu:
◼ “Tatou te naunau i mea ua fai mai ai le Tusi Paia e faatatau i le Atua ma Iesu Keriso, a ea? Ou te fiafia e fetufaai ma oe nisi o manatu sa ou aʻoaʻoina mai le polosiua lea na ou tuuina ia te oe i le vaiaso ua teʻa e faapea, Pe Ao ona E Talitonu i le Tolutasi?” Ona talanoaina lea ma le tagata o le aiga nisi o manatu o loo i le itulau e 14-16. E mafai foi ona e faaaofia atu ai ma nisi o manatu mai i le tusi o le Reasoning i ona itulau e 405-426, e faalagolago lea i le naunau o le tagata o le aiga. I le faaiuga, ia faasino atu e faapea, e lē o toe soifua Iesu i luga o le lalolagi, ma fai atu i ai le fesili o loo amata ai le vaega i le itulau e 16 e faapea, “Pe sili pea le Atua i lo Iesu?” Ia faamatala i ai e te fiafia tele e toe foi atu ma talatalanoa atili i lenei fesili i se taimi e talafeagai ai ma le tagata o le aiga.
5 Ua tatou fiafia lava, ona ua tatou mauaina le upu moni o le Afioga a le Atua, faatasi ai ma se malamalamaga saʻo e uiga i le Atua ma Keriso. O lea la, seʻi o tatou matuā vilivilitai ai e valaaulia isi, ina ia latou mauaina foi aogā mai lenei lava malamalamaga.