Polokalama Fou o le Fonotaga Matagaluega
1 O le matua o le a amata faasolo i le polokalama fou o le fonotaga matagaluega e amataina ia Setema o le “Ia Mataala, Ia Tutumau, Ia Faamalolosi.” E faavae aʻe i upu faalaeiau a le aposetolo o Paulo i Kerisiano o le uluai senituri o loo faamauina i le 1 Korinito 16:13.
2 O le a amataina le polokalama i le faatauaina o lo tatou manaoga faifai pea mo le iloiloina faaleagaga o i tatou lava. O le tausia pea o se tulaga malosi mo le mea ua tonu i nei “aso e gata ai” e manaomia ai le faatauaina moni o la tatou faiā ma Ieova ma lo tatou tulaga o iai ma lana faalapotopotoga faalelalolagi. (2 Timo. 3:1) O le a faamanatuina mai ai ia i tatou le talisapaia tele e le Atua o a tatou galuega fitā uma. E ao ona faatonuina i tatou i auala e faaleleia atili ai o tatou uiga faa-Kerisiano ma tausisia ai pea faaaoaoga lelei tau amio.
3 O le a faamamafaina ai foi le manaoga ia maelega i le galuega o le faia o soʻo a o aapa atu mo nisi faatelega ma tiute tauave faaleagaga. O manatu aogā i le pe mafai faapefea e tagata taitoatasi ma aiga ona tausisia se polokalama faifai pea o le fafagaina faaleagaga o le a faaalia mai i lauga eseese, faataitaiga ma talanoaga.
4 I le Aso Toonai o le a mafai ai e sui agavaa ona faailoa i le lautele lo latou tuuina atu e ala i le papatisoina i le vai. Ona oo ai lea i le Aso Sa, o le a tatou mananao uma lava e auai mo le lauga lautele e faaulutalaina “O le ā Lou Tulaga ma le Atua?”
5 O le a faaiuina le polokalama faatasi ma faalaeiauga ina ia tutumau mausali ai i le faatuatua, ma ia feagai pea le tasi ma le tasi i le agaga o le alofa ma le filemu. O le fonotaga matagaluega o se tasi o avanoa tāua ua saunia e Ieova mo i tatou uma lava e ‘taufaatupu ai e le tasi i le tasi le alofa ma galuega lelei.’ (Epe. 10:24, 25) Fai ni fuafuaga maʻoti ina ia auai i le polokalama atoa i aso uma e lua.