Ia Faatumauina se Uiga Mautinoa

¹ Maeu le faagaeetia o i tatou i le faitau atu e faatatau i faatelega ofoofogia o loo ua iai i le tele o atunuu! E ui lava ina tatou iloa e faapea i nisi o nofoaga, e masani lava ona fetaiai tagata talaʻi o le Malo ma uiga lē manatu mamafa mai, lē fia uai mai, po o teteega tuusaʻo i la tatou galuega talaʻi. E mafai faapefea ona tatou tumau i se uiga mautinoa pe afai o le tulaga lea i la tatou oganuu? E mafai faapefea ona tatou teteea se uiga lē mautinoa lea e ono faoa ai lo tatou olioli po o le faavaivaia ai o lo tatou maelega mo le galuega o le faia ma soʻo?

² O se uiga mautinoa o le a fesoasoani i a i tatou e faatumauina ai lo tatou tulaga paleni. E oo lava i lalo o tulaga faigata, e lē tatau ona tatou faatagaina manatu lē mautinoa e pulea la tatou vaaiga saʻo. Sa faataatia e Iesu se faataitaiga lelei atoatoa mo i tatou. E toaitiiti lava ni nai tagata sa taliaina mea na aʻoaʻoina e Iesu. O le toatele sa tausuai i ana aʻoaʻoga. Sa fesagai o ia ma tulaga sa iloga ona tofotofoina ai lona tumau. Sa faitioina e taʻitaʻi lotu lana galuega ma taupulepule e fasiotia o ia. Sa tuufeanu ia te ia, tapōina, tauemua, sasaina, ma iu lava ina fasiotia. E ui i lea, sa olioli o ia i le galuega na ia faia. Aisea? Sa ia iloa le tāua o le faia o le finagalo o le Atua, ma sa leʻi fiu ai.—Ioa. 4:34; 13:17; Epe. 12:2.

³ Tausia se Vaaiga Tatau o La Tatou Faiva: Ina ia faia faapea, e manaomia ona tamau i o tatou mafaufau nisi o vala. Ia manatua ua i a i tatou se feau e lē amanaiaina po o le teena e le toatele o tagata. (Mata. 13:14, 15) E ui lava sa faatonuina e taʻitaʻi o le malo le au aposetolo e aua neʻi toe aʻoaʻo e faavae i le suafa o Iesu, sa tumau pea lo latou faamaoni i lo latou tiute e talaʻi, ma sa faateteleina le seleselega. (Galu. 5:28, 29; 6:7) Ua uma ona tatou iloa e faapea i nisi o oganuu, e toaitiiti tagata o le a faalogologo mai. (Mata. 7:14) O lea la, ua i a i tatou le mafuaaga e olioli ai pe afai e na o se toatasi se tagata e tali lelei mai i la tatou feau. Ia manatua foi, e oo lava i a i latou e tetee mai e tatau lava ona tuu atu i ai se avanoa e faalogo ai. (Eseki. 33:8) O nisi o tagata sa tetee, ae mulimuli ane suia ma avea ma tagata tapuai i a Ieova. Pe a saʻo le vaai, ona tatou maua ai lea i la tatou faiva se faalogona o le faataulauina, e tusa lava pe toalaiti nisi e fia faalogo mai. O lo tatou oo atu i aiga ma le feau o le Malo o le Atua ua avea o se molimau.—Eseki. 2:4, 5.

⁴ Ua i a i tatou mafuaaga lelei e mautinoa ai la tatou vaaiga. O le faamanuiaina o le galuega i le lalolagi aoao ma le faatupulaia o faamaoniga o le lalata mai o le puapuaga tele, ua tatau ai ona uunaia i tatou uma e fai le mea sili e mafaia e auauna atu ai ma le tuutoina i le Atua. (2 Pete. 3:11, 14) O galuega maelega i a Aokuso o le a avea lea o se auala lelei e faaalia ai lo tatou talisapaia mo mea ua tatou aʻoaʻoina. Tatou te mananao foi i a tatou aumea fou e faatino se uiga mautinoa i le faaaogāina o mea o loo aʻoaʻoina ai i latou. Afai ua agaigai i luma nisi o a tatou tagata aʻoga i le ono avea ma tagata talaʻi e leʻi papatisoina, atonu o le masina o Aokuso o se taimi sili lea ona lelei e amata ai.

⁵ Pe tatou te auauna o ni tagata talaʻi po o ni paeonia, o i tatou uma lava e maua le fesoasoani pe afai e tamau i o tatou mafaufau faapea o mea e finagalo i ai Ieova tatou te faia e lē mamafatu. (1 Ioa. 5:3) Ua ia folafola mai na te lagolago i a i tatou. (Epe. 13:5e, 6) E ui lava i le lē fia uai mai o le lautele, lē ano mai, po o le tetee, ae e tatau lava ona tatou maumauai ma faaauau ona talaʻi, auā o le finagalo o le Atua ua tatou faia ai faapea.—1 Timo. 2:3, 4.