Pe Mafai ona E Toe Auai i le Paeonia?
1 I le lima tausaga ua tuanai atu, e faitau afe paeonia sauatoa na manaomia ona tuua le paeonia. Pe sa avea oe ma se tasi o i latou na? Afai o lea, e lē taumatea la sa i a te oe se mafuaaga na e faamaamulu ese ai i lenei faaeaga. Atonu o se mea sa leʻi faatalitalia pe lē maalofia. Pe o iai pea la lena mafuaaga? Afai o le tulaga i lou soifua maloloina, o se faafitauli tau tupe, po o avega tauave i le aiga na mafua ai ona e tuua, pe ua faaleleia lea tulaga? Pe e mafai ona e faia ni fetuutuunaiga fetaui ina ia faataga ai oe e olioli i le faaeaga o le toe avea ma paeonia sauatoa? Po o e mafaufau e toe talosaga atu?
2 E pei ona e iloa, o se faamaopoopoga lelei ma se faasologa lelei, e manaomia ina ia faamanuiaina ai oe o se paeonia. E ui lava ina masani ona lē tele se taimi mo malologa, ae o se taimi puupuu e malōlō ai se paeonia ua faamaonia le sili atu ona faamalieina ma tauia ai. (Faata. 19:17; Galu. 20:35) E ala i le pisi i le auaunaga, ua puipuia ai oe mai i aafiaga o se olaga e sailia ou lava manaoga manatu faapito, o se olaga faataigamalie lea o loo pupū atu i ai le lalolagi. Ua folafola mai e Ieova o le a ia faatamaoaigaina oe faaleagaga pe afai o e faataulagaina totino oe lava ma tuu faamuamua manaoga o le Malo. E mautinoa o le a e tofo i le olioli moni ma le lotomalie i le auauna atu ma le loto atoa i le auaunaga i a Ieova.—Faata. 10:22; Kolo. 3:23, 24.
3 Pe tatau ea ona vaai atu i le faiva faataimi atoa o se faaeaga ua faaavanoa mo na o ni nai tagata faapitoa? E leai. I le manatu atu i la tatou tautoga e tuuina atu o tatou ola i a Ieova, o Kerisiano uma lava e tatau ona manatunatu mamafa e uiga i le auaunaga faataimi atoa seʻi vaganā ua lē mafaia lava ona o nisi tulaga.—Mare. 12:30.
4 Afai o lou soifua maloloina ma tiute tauave faale-Tusi Paia ua lē mafai ai ona e paeonia i le taimi nei, e mafai ona faamautinoaina oe e faapea o loo silafia e Ieova ma e malamalama foi o ia i ai. O le a ia tauia oe ona o lou faamaoni i avanoa o faatagaina ai oe e tusa ai ma lou tulaga. (1 Kori. 4:2; 2 Kori. 8:12) Ae, afai o lea ua foliga mai i le taimi lenei ua fetaui lelei mo oe ona toe paeonia, aisea la e lē faalatalata atu ai i le ovasia taimua ma faatoai atu mo se pepa talosaga?
5 Pe Mafai ona Fesoasoani Lou Aiga? Atonu ua e tuua le paeonia ona ua e manaomia le tausia o avega tauave mo le aiga. Pe e talafeagai ea i isi tagata o le aiga i le taimi nei ona faia lea fesoasoani ina ia mafai ai ona e toe auai i le galuega paeonia? Mo isi, faatasi ai ma sina fesoasoani laitiiti i le tausia o tiute tauave, ua mafai ona toe ausia le paeonia.
6 O le lagolagosua lelei ma sina taumafaiga faaopoopo mai isi tagata o le aiga, o le a mafai ai lea tulaga. Atonu e fesoasoani atu i tupe po o femalagaaiga, faatasi ai ma fuafuaga faifai pea ina ia galulue faatasi i le auaunaga. Atonu e iai nisi auala e mafai ona latou fesoasoani ai. Afai o lou tulaga ua lē faatagaina ai oe e toe faaauau i lenei faaeaga o le auaunaga, atonu la o fesoasoani faapena e mafai ona tuuina atu i se isi tagata o le aiga o mafai ona ia faia faapea.
7 Aisea e lē iloilo ai lenei mataupu o se aiga? O le faamoemoe o le avea o se tasi o sui o le aiga ma paeonia atonu e lelei pe a avea o se fuafuaga tuufaatasi a le aiga. Afai e mafai ona faaopoopo atu se isi paeonia i le vasega o paeonia, o le a lagonaina e sui uma o le aiga e faapea ua iai so latou sao. O se agaga tauofo faapena e lē gata ina o le a faaopoopo atu i le molimau o le Malo i le oganuu, ae o le a vavalalata ai foi faaleagaga le aiga.—Luka 6:38; Fili. 2:2-4.